Груевски не се препознава во изјавата на дипломатите

Премиерот ги пренасочи забелешките на ЕУ, НАТО, ОБСЕ и на САД кај поединци што го опструираат Рамковниот документ

Оливера Војновска

Шефот на Владата и лидер на десницата, Никола Груевски, не се препознава во писмото кое Македонија го доби од четирите клучни меѓународни инстанции. По дводневен молк, македонскиот премиер, вчера во Собранието, забелешките во заедничката изјава на ЕУ, НАТО, ОБСЕ и САД ги пренасочи кај опструирачите на Охридскиот договор, и ја повтори познатата фраза дека тој и неговиот Кабинет работат посветено на евроинтеграциите, Рамковниот, борбата со корупцијата, криминалот... Груевски го кажа ова на седницата за пратенички прашања, на која задоцни 41 минута. Опозицијата протестираше поради ваквото „недозволиво и арогантно однесување и потценување“ на парламентот како институција.

Додека пратениците од ВМРО-ДПМНЕ трпеливо го чекаа премиерот, социјалдемократите гласно негодуваа, покажуваа на часовникот и од место дофрлуваа. „Каде ни е премиерот“? „Станат ли е, да не спие уште“? „Да не падна Владата?“... Се редеа прашања од левата страна на пленарната сала. Нивните колеги од ВМРО-ДПМНЕ молчеа, пратениците од ДУИ си гледаа сеир, министрите муабетеа. Јавниот обвинител Љупчо Шврговски, кој исто така беше дојден на седницата, го прелистуваше дневниот печат. Кога Груевски, конечно, се појави во салата, опозицијата го дочека со аплауз. Но, тој целосно ги игнорираше. Спокојно си седна на неговото место.

„Оваа Влада работи со сите сили за да се подобра состојбите во земјата на секој план. Реакцијата на дипломатите се однесуваше, пред се', на поединци кои го опструираат Рамковниот договор. Оваа Влада е целосно посветена на негово имплементирање“, изјави премиерот, одговарајќи на прашањето на пратеникот од СДСМ, Андреј Петров, според кого Груевски ја води државата во погрешен правец.

Премиерот не е загрижен и има разбирање за перцепцијата на Петров, бидејќи, како што рече, нормално е генералниот секретар на СДСМ да ја критикува власта. Нагласи дека Владата е фокусирана на проблемите што се јавуваат тековно, како и на работи што се наследени како проблеми од поранешната Влада.

Незадоволен од одговорот на Груевски, Петров посочи дека е недозволиво премиерот да ја пренасочува одговорноста на друга страна. „Наместо да ги преиспитате постапките и да извлечете поука од писмото на дипломатите, забелешките ги префрлате на опозицијата“, рече Петров. „Наместо да се решаваат проблемите на граѓаните, 50 дена ќе се слави годишнината на ВМРО-ДПМНЕ“, рече Петров. Владеењето на Груевски го спореди со режимот во Северна Кореја. Тој го спомена и скандалот со писмото од еврокомесарот Штеван Филе. „Го скривте и писмото од еврокомесарот. Некои луѓе во парламентот ќе се срамат поради ролјата што ја одиграа“, констатира Петров , алудирајќи на спикерот Трајко Велјаноски и на шефицата на пратеничката група на ВМРО-ДПМНЕ, Силвана Бонева.

И на вчерашната собраниска седница премиерот и министрите на долго и на широко одговараа на прашањата од пратениците на ВМРО-ДПМНЕ. Премиерот говореше за дострелите во образованието, особено во средното и високото. Редеше фантастични проценти - 96,5 отсто матуранти кои во 2009 година се запишале на факултет, а 98 отсто полуматуранти запишани во средните училишта. Министерот Иво Ивановски беше импресиониран од тоа што Интернет-пенетрацијата во земјата во 2009 година во светски рамки забележала напредок од осум позиции, од 57. на 49. место. Социјалдемократот Марјанчо Николов ги оквалификува ваквите долгометражни и фалбаџиски настапи, како што се „ЕПП на Владата“. „Пенетрацијата на Интернетот во Беровско е 100 проценти, но, за жал, пенетрацијата на комуналната структура е нула проценти“, иронизираше Николов.

Министерот за надворешни работи, Антонио Милошоски, одговарајќи на пратеничко прашање, рече дека очекува одредени препреки на патот поврзани со различни перцепции за насловот со кој Македонија ќе претседава со Советот на Европа, а се предизвикани од Грција. „Свесни сме за разликата со јужниот сосед, но начинот треба да биде прагматичен и применлив - не со име, туку со изведена придавка – ’македонско претседателство‘, што се однесува на нашиот јазик, идентитет...“, рече тој.