25.09.2012, 14:22 Николиќ: Србија за директни преговори на највисоко ниво
Претседателот на Србија Томислав Николиќ порача денеска во Њујорк дека Србија е приврзана кон постигнување на траен мир меѓу Србите и Албанците и оти се залага за директни преговори на највисоко политичко ниво, без признавање на независноста на Косово.
- Србија сака трајно, одржливо и прифатливо решение за сите проблеми, сака да оди напред кон европската иднина и во целост е приврзана на процесот, чиј резултат би требало да биде траен мир меѓу Србите и Албанците, истакна претседателот.
- Ние имаме силна желба разговорите да продолжат во добра волја и добра намера, имајќи го предвид, меѓу останатото и фактот дека е важно да се одржи динамиката на евроинтеграцијата на Србија и Западниот Балкан со цел долгорочно да се обезбеди напредокот и стабилноста на целиот регион. Србија нуди конкретен предлог - директни преговори на највисоко ниво, порача Николиќ во седиштето на ОН во Њујорк.
Николиќ нагласи дека Србија и тој самиот како нејзин демократски избран претседател се подготвени за конструктивно учество во преговарачкиот процес.
Според него договор може да се постигне само врз база на консензус, без еднострани одлуки и акции.
- Истовремено дозволете ми да бидам јасен: Србија не е подготвена, не може и никогаш, под ниту еден услов нема да ја признае, ниту експлицитно, ниту имплицитно, еднострано прогласената независност на својата јужна покраина Косово и Метохија, порача Николиќ.
|
