Мислења

Влатко, what’s wrong with you?

Филип Петровски

Дали, конечно, е покажана целта да не одиме во ЕУ? Го менуваме ли нашиот стратегиски концепт - граѓаните имаат право да знаат

Минатата недела беше полна со случувања од голем интензитет, кои ја тресеа политичката сцена. Не е можно се' да се покрие и искоментира и затоа бев принуден да се определам да пишувам само за два настана, кои сметам на сите ви оставиле впечаток и за нив сте промислувале и постфестум, во најмала мера, сте се чуделе.

Прво, нема човек што не знае за таканаречениот упад на полицијата во А1. Јас кога вклучив вести (минатиот четврток), се зашеметив. Гледам, полиција пред телевизијата. А во вестите (дез)информација дека телевизијата е блокирана и никој не може да влезе и излезе. Нормално дека се намрштив и се згрчив. Никогаш нема да се согласам со насилно и недемократско владеење. Не е тоа мој ментален склоп. Секогаш кога ќе видам неоправдана демонстрација на сила од власта, го кревам гласот. Кој и да е во прашање. Од минута во минута ситуацијата стануваше се' подраматична. По вестите, се продолжи со програма во живо. Набргу почнаа да пристигнуваат незадоволни граѓани, кои ја поддржуваат телевизијата од сите страни. Иако се протури информацијата дека приодот кон телевизијата е блокиран, сепак, се виде дека неколку стотици граѓани се присутни пред портите на А1. Верувам дека адреналинот нагло скокна на сите страни. Судејќи според однесувањето на новинарите во студиото, нивниот адреналин беше ептен висок. Зафати еуфорија. Тука нешто почна да ми станува чудно. Во прв ред се истопорија високи функционери на СДСМ. Дури видов и градоначалници од други градови. Си велам, овие биле ептен демократи штом ги виделе првите 15 секунди од информациите веднаш „спонтано“ седнале в кола и тргнале за Скопје.

Наскоро почна отворената програма во која се наредија првенците на СДСМ, но и на нивната коалиција. Со чудесна организираност тие си седнуваа, рецитираа за режимот на Чаушески, за Северна Кореја, за тоталираризмот и слично. Се' е тоа во ред. Има силни елементи што велат дека споредбите се на место. Впрочем, за тоа сум пишувал повеќе пати. Меѓутоа, наредените опозиционери, како по нота си рецитираа. И тоа во студио што беше блокирано и во кое немаше пристап. Некаде во тоа време, добив сугестија и јас да се јавам со поддршка. Дека сите опозиционери биле таму и требало да се фати возот. Но, јас се' повеќе се сомневав дека работата е таква каква што се прикажува. Мислам дека по снимката на новинарката, која им се џитка на полицајците в раце, ми стана дефинитивно јасно дека за вистината ќе треба да почекаме и да споредиме информации од повеќе извори. Да видиме дали полицијата туку така, напразно ја блокирала телевизијата или, пак, има уште нешто во целата ситуација за што не сме известени.

И така и бидна. Интензитетот на настанот ја принуди власта преку телевизиите што и' се блиски да одговори. Се разбира дека во прашање беше само еден интерес, да се спречи поголемо нанесување штета на рејтингот. Тие мораа да парираат. Да ја повлечат својата тешка артилерија. Па, затоа го викнаа Латас дури од вечера со Цеца, на што тој со резигнација реагираше. Ама мораше, пропаганда си е пропаганда. Ќе се види со Цеца кога сака. Имаат блискост. Плус таа до Нова година може да одржи уште некој концерт... Елем, иако и од таа страна беше пропагандистички одговорено, сепак ,успеавме да дојдеме до многу значајна информација дека не била полицијата сама во А1, туку дека многу порано дента, во тамошниот објект влегле инспекции. Тие имале намера да извршат проверки, контроли. По закон де, се' што им е на располагање. Намерата им била спречена на каубојски начин. Не им давале документи. Нешто слично како и во 2006 кога премиер беше Бучковски. Верувам, го видовте Велија како ја тегне инспекторката за чанта. Тоа на Запад нема да го преживее ниту Доналд Трамп. Тоа е како да сте ја повлекле за рамо цела држава. Тоа не си го дозволува ниту најбогатиот ниту најмоќниот поединец. Сепак, тука може така. Па, дури и да си купите четиригодишен мир. Одозгора на се', и да ви плаќа Владата и владејачката партија милиони наши евра само за да не се свртите против. Бог да чува!

��о околу три часа, ситуацијата стана комична. Најмногу кога се појавија Левите сили и оној пионерот што имаше в рака тенџере по кое чукаше во кутлача. Си ја превртев мислата. Си реков, ајде да си замислам дека од утре се на власт. Ете, успеваат со идејата да ја урнат оваа гарнитура и седнуваат во парламентот и во владата. Како бре тој со тенџерето ќе владее? Што ќе направи тој за ние да живееме подобро во државата? Не е ни битно во краен случај, затоа што веќе се' се претвори во циркус.

Деновиве еуфоријата спласна. Велија се повлекува. Парите што ги пронајдоа, за кои тврдеше дека му ги дале од ДПМНЕ на црно, не биле дадени на црно. Тоа го кажал во еуфорија. Призна. Исто така и новинарите, на кои беше горд оти „знаел дека ќе ја извршат задачата“ - исто така биле во еуфорија. Само едно прашање ќе поставам: ако погинеше некој граѓанин или полицаец таа вечер, ќе можеше ли да се извинува како ништо да не било? Што е ова - забавна емисија, сам свој мајстор, идол? Реално шоу без последици? Ах, кога ќе сфатите дека од оваа несериозност и произведување циркуси страда државата и целиот народ?

Второ, Влатко Ѓорчев и неговиот настап во Брисел. Го гледам човекот и не можам да верувам што зборува. Се разбира, владините телевизии не го пренесоа. Се обидоа да го покријат мега мега скандалот. Мислам А1 го пренесе. Нагласувам дека го слушав него што зборува, а не информација пренесена од новинарот. Го слушав неговиот лакејски англиски. Нападот што го прави врз Фуере дома, а сега и во седиштето на ЕУ не може да биде во никој случај добар за нас. Ниту продуктивен. Ниту ќе ни донесе поени. Да не зборувам да не доближи до нашата стратегиска цел да бидеме дел од тоа семејство. Тогаш, што му е намерата на човекот? Ако е ова само негова идеја, тогаш Груевски ќе се огради. Со тоа на некој начин ќе ја намали штетата за него самиот, а најмногу за Македонија. Тоа, гледам, не се случи. Значи, се чини на Влатко му е издиктирано да го предизвика инцидентот. Во име на партискиот интерес Фуере да се прикаже за пријател на СДСМ директно пред Брисел. Се смеам. Па, дали веруваат дека оттаму ќе добиеме одговор дека Фуере не е претставник на интересите на ЕУ. Дури и да не им се допаѓа неговата работа на неговите шефови, тие никогаш нема да се откажат од него. Побогу, има протоколи во дипломатијата и се знае што се зборува, а што не.

Дали, конечно, е покажана целта да не одиме во ЕУ? Го менуваме ли нашиот стратегиски концепт? Граѓаните имаат право да знаат, оти во наше име се прават сите овие испади. Ние ќе го јадеме стапот најмногу. И тоа со години во иднина, да не речам со децении. Ова го тврдам. Исечете го овој текст и ставете го во фиока. Па, прочитајте го пак во 2015. Или, пак, јас ќе ве потсетам повторно на него тогаш. Ќе видите дека ќе се ��ртиме в место. А вртењето в место е враќање назад. Нели ви е доста од тоа?

(Авторот е доктор по политички науки)

http://www.filippetrovski.com