Што прават денеска

Тања Вуисиќ-Тодоровска

менаџерка во МОБ

Поради обврските во МОБ и предавањата на Одделот за балетска педагогија при ФМУ, се вратив од Италија, каде што Македонскиот балет е на турнеја до 1 февруари 2011 година. Критиките досега се одлични, мислам дека се и над очекувањата. Кога ќе завршам со обврските во Македонија, на 28 декември повторно се враќам во Италија.

Петар Горко

актер

Денеска имам голема причина за одмор од театарот. Освен тоа што земам здив по пробите и премиерата на „Опасни врски“, денеска ќе го прославиме и третиот роденден на ќерка ми Јована. Се разбира дека денот и' е посветен на неа, но, сепак, наоѓам време и за проба. Иако ова ќе ми биде 16 година во улогата на битолски Дедо Мраз, сепак, треба да се направат проби.

Искра Трпева-Арсовска

пејачка

Обврските започнуваат уште рано наутро во МБУЦ, каде што мојата класа на соло-пејачи се подготвува за вечерашниот концерт што ќе се одржи во училиштето. Истовремено се подготвуваме и за новогодишниот концерт во МОБ, кој во петок, 24 декември, учениците од МБУЦ ќе го одржат во МОБ, во салата „Империјал“.