Насловна

Се' помалку основци во Тетовско

Намалениот наталитет и преселбите во странство ги десеткуваа училиштата

Гојко Ефтоски

ТЕТОВО - Од генерација во генерација се' помал е бројот на децата во тетовскиот крај што се запишуваат во основно образование. Оваа констатација се потврдува и со фактот дека последниве неколку години бројот на ученици-основци годишно се намалува од 300 до 500. Од информации во шесте општини во Тетовско, може да се извлече сознание дека се намалува бројот на учениците, а има населби каде што се преполовува. Некаде дури и се затвораат цели училишта.

Според сознанијата на службите за образование во локалните самоуправи во Тетово и петте општини Боговиње, Брвеница, Желино, Теарце и Јегуновце, две причини го условуваат ваквото осипување: очигледно намалениот наталитет и растечката сиромаштија, која ги принудува семејствата да ги напуштат родните огништа и да се преселат во странство.

Во ОУ во Доброште, на пример, во паралелките од прво до осмо одделение пред 20 години имало 600 ученици, додека сега оваа бројка е сведена на 400. Во соседното село Одри за претстојната учебна година во ос��о одделение се запишале одвај 15 деца. И во двете села станува збор за релативно големи села. Во Долно Орашје настава се изведуваше од прво до четврто одделение, но поради тоа што бројот на децата е сведен на минимум, тие наместо во родното село, префрлени се во Одри до каде што имаат организиран превоз. Слични сознанија се добиваат и од другите реони во тетовскиот крај.

Советот на Општина Тетово на последната седница донесе одлука за т.н. реонизација, со која се определуваат реони во кои училишта децата ќе можат да се школуваат во основно образование. На ваков чекор била определбата за да се спречи трката по деца по други улици и реони, со што во некои училишта бројот на ученици формално не се намалува, но влијаел на состојбата во училиштата каде што децата реонски припаѓале. Како резултат на ваквите односи, во ОУ „Кирил и Методиј“ настава на македонски јазик за наредната учебна година биле запишани само четири деца во прво одделение. Во ова училиште очекуваат состојбата да се подобри по одлуката на Советот на Општината за реонизација во основното образование.