Реџо Балиќ

радиоводител

Според временската прогноза, очекувам денешниот ден да го минам снежно, т.е. да уживам во снегот, гледајќи го од прозорец. Всушност, денот ми е вообичаено саботен, без некои големи работни обврски, но, за жал, и без некоја претпразнична атмосфера. Се надевам дека снегот ќе ни донесе барем некаков новогодишен дух.

Борче Христов

фудбалски тренер

По успешната есенска сезона со второпласираниот тим во Азербејџан - „Баку“, каде што работам како асистент на шефот на стручниот штаб, Ѓоко Хаџиевски, и со поранешниот голман на Вардар, Муарем Зекир, дојдов во Скопје да ги минам новогодишните празници со семејството и со пријателите. Одморот ќе биде кус, но го испланирав времето да се видам со сите мои поранешни клупски колеги и тренери.

Саше Петковски

претс. на Совет на Опш. Аеродром

Секој ден се судирам со големи проблеми поради незаконската работа и самоволие на градоначалникот Кирил Тодоровски. Благодарение на сплотеноста на сите членови на Советот, се обидуваме заеднички да ги решаваме проблемите што секојдневно ги иницира Тодоровски.