Личност на денот
Линдзи Вон
Сезонава стана првата Американка која успеа да ја освои титулата во СК две години по ред
За време на еден тренинг на ОИ во Торино 2006 година беше однесена со хеликоптер преку планините со страв дека има тешка повреда на грбот и дека нејзината кариера е завршена. Но, за среќа, Линдзи Вон, која од своите две години е на скии, излезе од болница само еден ден подоцна. И не освои медал во Италија, но оттогаш го импресионира светот со успесите во Светскиот куп. Сезонава стана првата Американка која успеа да ја освои титулата во СК две години по ред. Покрај тоа, ја одбрани титулата и во спуст, а наедно се промовираше и во прва Американка со Мал кристален глобус во супервелеслалом. Сепак, 22. победи во Светскиот куп во четири дисциплини (нема победа само во велеслалом) и двете злата од светските првенства, од најуспешната во историјата на американското скијање направија херој во Европа, но не и во САД, каде што сите се одгледувани во духот на светите олимписките медали.
Но, тоа не ја загрижува, напротив, и' одговара, бидејќи има поголемо искуство како идолизатор (Пикабо), отколку како идол. Линдзи, која живее во Парк Сити, Јута, со својот сопруг, бившиот скијач Томас Вон, знае што има направено, но не знае точно што значи тоа. Како што вели самата, познава многу шампиони кои ги рангира на повисоко ниво, но „јас не се чувствувам така, јас сум само малата Линдзи“. (Н.К.)
|
