„Македонија 2025“ помага на пријатели

Македонските Американци можат да ги отворат вратите за комуникација со потенцијалните инвеститори

Александрија Стевковска

„Јас им помагам на роднините и на пријателите. Јас не сум инвеститор и поради тоа немам инвестирано во никоја држава во светот, па ни во Македонија. Тоа не е мојот бизнис. Единствено што можам да и' дадам на мојата држава е искуството и контактите“, вака ги оцени ефектите од двегодишното функционирање на проектот „Македонија 2025“ и своето учество во него, еден од неговите лидери Мајк Зафировски. Тој, заедно со останатите директори, кои се дел од бордот директори на „Македонија 2025“, Македонци кои пред години се иселиле од земјава и станале успешни бизнисмени во Америка, вчера се сретнаа со овдешните директори, со цел да дознаат до каде е земјава во развивањето можности за привлекување странски инвестиции и да дадат насоки како тие да се подобрат. Нивните согледувања досега се дека Македонија е на добар пат за економски просперитет, но треба уште многу да се изоди за земјава да стане привлечна дестинација на повеќе инвестиции. Тие, како македонски Американци, единствено што можат е да ги отворат вратите за комуникација меѓу Македонија и потенцијалните инвеститори и евентуално да помогнат преку вработување Македонци во нивните компании во Америка.

„Најголемото достигнување на ’Македонија 2025’ е тоа што ги отворивме вратите за комуникација со многу странски компании кои се запознаа со можностите за вложување овде и со потенцијалите што ги поседува оваа земја“, објасни Зафировски. Заеднички став на бордот директори на „Македонија 2025“, каде што, освен Зафировски, членуваат и Емил Христов, Роберт Арсов, Алекс Кормушов и Митре Кутановски, е дека Македонија мора да инвестира во образование и нова технологија.

„Македонија треба да вложува во образование и во нова технологија ако сака да биде силна и успешна економија, а напорите да ги насочи не само кон привлекување инвестиции, туку и кон отворање нови пазари со цел поголем извоз“, порачаа членовите на бордот директори на „Македонија 2025“. „Нашиот совет е развој на економијата, која е најважен приоритет, посветеност за подобрено образование и работна сила, со цел подобра иднина за следната генерација Македонци“, додаде Зафировски.

Нивната оцена е дека Македонија се движи во вистинската насока, но дека, сепак, останува уште многу да се сработи. „За економски развој треба вистинска акција. Последните четири години земјава бележи прогрес во повеќе сфери, но напорите за подобрување на состојбите мора да продолжат“, рече Зафировски, додавајќи дека се' уште еден од клучните проблеми е високата стапка на невработеност, додека буџетскиот дефицит е на ниско ниво.

Македонија треба да им покаже на потенцијалните инвеститори дека има кадар и инфраструктура. Според бордот директори, странските компании поради глобалната криза ги ограничиле инвестициите и се' уште се соочуваат со предизвиците што се последица од кризата.

Христов, Арсов, Кормушов, Кутановски и Зафировски, кои се успешни македонски бизнисмени во САД, вчера имаа работна средба со претставници од домашни фирми, на која им беа посочени актуелните проблеми во стопанството. Бордот директори ќе им помогне со совети, сугестии и предлози на компаниите од земјава во делот на освојување нови пазари, привлекување инвестиции, развој на информатичка технологија и глобализација на бизнисите. Денеска бордот ќе има средба со премиерот Никола Груевски и други високи претставници од Владата.

Според профилот што го има „Македонија 2025“, таа треба да биде независна и неполитичка организација, предводена од успешни македонски бизнисмени од дијаспората посветени на зајакнување и подобрување на економијата на Македонија.