„БЕБЕ САЕМ“

Три дена забава за трудници, бебиња, родители и деца

Со настапот на децата од фестивалот „Поточиња“, вчера точно напладне на Сајмиште и официјално беше отворено второто издание на „Бебе саем“, едукативно-забавна манифестација, посветена на трудниците, бебињата, родителите и децата. Саемот ќе трае до 25 април, а на него се очекува да биде надмината минатогодишната бројка на посетители, која изнесуваше 7.000. „Целта што си ја поставивме лани, по завршувањето на првиот „Бебе саем“, ја постигнавме. Второто издание е многу побогато и поголемо“, рече Златко Панков, организатор на ивентот. Тој додаде дека доволен доказ за големата заинтересираност за настанот е што уште на првиот ден на отворањето точно во 10 часот веќе имало повеќе заинтересирани што нетрпеливо чекале да влезат. Трите саемски дена нудат најразлични содржини, почнувајќи од караоке-шоуа, игротеки, театарски претстави, настап на детски групи, наградни игри, натпревари во брзо пресоблекување на бебиња од страна на татковци, натпревар во лазење, избор на производи за бебиња, деца и мајки... Работното време на саемот е од 10 до 20 часот, а влезниците чинат 50 денари. (К.Ш.)