РАДМИЛА ШЕКЕРИНСКА

Пратеничката роди ќерка

Актуелната пратеничката од редовите на Социјалдемократскиот сојуз на Македонија Радмила Шекеринска стана мајка. Шекеринска се породи вчера во 10,30 часот во приватната болница „Мала Богородица - Систина“ и на свет донесе здраво женско бебе, за чие име допрва ќе се размислува. Наследничката на Радмила и нејзиниот сопруг Божидар Јанковски, попознат како Бобо Дајнерс, со кого е во брак три и пол години, се родила тешка 3.200 кг, а според нивни блиски, и таа и мајката се чувствуваат одлично. „Породувањето мина со царски рез, а Радмила и бебето се супер“, велат нивни пријатели, кои вчера не престанаа со честитки и најубави желби за првородената ќерка.

Како што неофицијално дознаваме, честењето мекици, најверојатно, ќе биде утревечер во реномиран скопски ресторан. Избори блиски на двојката велат дека и обајцата родители се премногу возбудени од раѓањето на првата заедничка рожба (за Бобо ќеркичката е второ дете по синот од првиот брак), која дојде на свет само десетина дена по влегувањето на мајката во деветтиот месец од бременоста. Шекеринската до последен ден ги извршуваше своите работни обврски во Собранието, а како што ни изјави во нејзиното неодамнешно интервју за „Утрински весник“, бременоста во повеќе сегменти го промени нејзиниот начин на живеење, особено во поглед на навиките за исхрана. „Не излегувам од дома без да јадам. Како за промена, јадам повеќе овошје. Но, најмногу се мачам со обврската да јадам секој ден месо, јајца и печурки. Ги избегнувам сендвичите и ги намалувам тестенините“, додаде Шекеринска. (К.Ш.)