Груевски ќе влече поуки од критиките на ЕУ

Премиерот Никола Груевски очекува во извештајот на Европската комисија за напредокот на Македонија да се потврди препораката за почеток на преговори. Тоа, според него, би значело дека ЕК и натаму смета дека државата политички, економски и културолошки е дојдена на ниво да може да ги почне преговорите за полноправно членство.

„Реално е во извештајот на ЕК да се констатираат и напредоци и некои забелешки, доколку ги има. Ние од тие забелешки ќе извлечеме поука и ќе направиме акционен план за нивно подобрување. На некој начин тие ќе бидат наш водич за следната година во кој правец да се фокусираме за подобрување на одредени сегменти од најразлични сектори. Важно е каква ќе биде генералната оцена, односно дали таа ќе биде во позитивно или во негативно светло и дали ќе се потврди или не веќе даденото мислење за почеток на преговорите“, рече Груевски.

Прашан дали беа неопходни новите вработувања во Секретаријатот за европски прашања, иако се укажува на слабости во јавната администрација, премиерот рече дека во минатиот период се направени одредени реформи во оваа област и оти верува дека тие ќе бидат забележани во извештајот.

„Има уште многу простор да се работи, уште многу работи да се подобрат. Продолжуваме да бидеме фокусирани на јавната администрација, особено сега откако ЕУ го доби извештајот на консултантската компанија СИГМА, од кој таа ќе црпи информации за натамошните препораки што ќе ни ги даде, за натамошната модернизација и реформи во јавниот сектор“, рече Груевски.

Тој додаде дека реформите досега биле раштркани во повеќе јавни институции и тоа била една од слабостите. „Не случајно ни беше сугерирано тоа да го концентрираме на едно место“, изјави премиерот. (МИА)