Со „Тешкото“ на бунт против власта

Ги критикуваше сите досегашни власти, го посоветува премиерот Никола Груевски да ги пакува куферите, и' објави војна на мафијата, им се спротивстави на олигарсите... Со такви пораки настапи лидерот на ОМ, Љубе Бошкоски, пред неколку илјади приврзаници на прексиноќешниот бунт кон власта во Скопје. Пред Старата железничка станица, која, како што вели Бошкоски, симболизира едно запрено македонско време, се играше „Тешкото“, ечеа зурли и тапани, со цел „да се разбуди и раздвижи македонскиот народ“.

Бошкоски му порача на Груевски дека „е готов“ и соопшти дека Владата на ОМ ќе води жестока битка против криминалот и корупцијата.

„Ќе се бориме против криминалците, кои со директорска плата имаат резиденции во Нерези. Против оние што го пљачкаат својот народ, што апсат полицајци за пет евра - за да се сликаат, додека вистинските криминалци остануваат неказнети“, рече Бошковски.

На митингот, кој почна со задоцнување, наводно, поради тоа што дел од симпатизерите од внатрешноста биле оневозможени слободно да дојдат во Скопје, доминираше иконографија во жолта боја и се носеа транспаренти „Борете се за државата, а не за партиите“, „На народот му треба храна, а не споменици“, „Бегајте од власта“...

„Мора да ја внесеме Македонија во НАТО и во ЕУ. Мора да ги прифатиме европските правила, бидејќи Македонија е срцето на Европа“, рече Бошкоски. Тој ги критикуваше состојбите во образованието, земјоделството, здравството, правосудството... Соопшти и дека е готова изборната програма на ОМ, во која имало решенија за проблемите во сите сфери од општеството.

Бошкоски се пофали дека има 65 илјади приврзаници и дека ОМ е најголема партија во државата. (А.М.М.)