Кавга во Собранието

Тамара Грнчароска

Со политички и лични навреди, обвинувања кој што направил за македонското евроинтегрирање, кој каков личен капацитет има и дали лаже, седницата на Националниот совет за евоинтегрирање се претвори во непродуктива дискусија од неколку часа водена меѓу претставниците на власта и опозицијата во националното тело, кое вчера требаше да дебатира за Извештајот од ЕК.

Искрата беше фрлена откако Флора Кадриу, па потоа претседателката на НСЕ, Радмила Шеќеринска-Јанковска, проговорија за случувањата околу телевизијата А1. Според нив, тие биле притисок врз слободата на медиумите и демократијата во земјава, нешто ќе биде нотирано од ЕК. Шеќеринска проговори и за опструирањето на работата на НСЕ од страна на Владата со недоставување информации.

Поп-Арсов ја обвини Шеќеринска дека можеби Владата и' одговара на нејзините дописи со кои се бараат информации до каде е процесот на евроинтегрирање, но таа не кажува. Според Поп-Арсов, со појавувањето на отворената програма на А1, опозицијата штитела компании што работат нерегуларно и побара извинување од Шеќеринска за изјавата дека „луѓето наместо да ја гледаат серијата ’Лисјата паѓаат’, гледаа како Груевски паѓа, и тоа на недемократски начин“.

Прозван за искривеното читање на извештајот на ЕК од страна на Владата, вицепремиерот Васко Наумовски жестоко возврати, но не со објаснувања и аргументи, туку со лична дискредитација и дисквалификација на Жерновски како портпарол на Ерван Фуере, а на Петковски како преставник на политичкиот систем на СФРЈ. Според него, и двајцата досега не направиле ништо за евроинтегрирањето на Македонија. Жерновски на тоа му возврати дека тој е недораснат за функцијата што за извршува.

На Шеќеринска Наумовски и' се обрати со зборовите: „Не сум сигурен дали сум во НСЕ или во Национален совет за недемократско уривање на власта“ и побара извинување од неа. Топката за пропуштената шанса за поднесување барање за кандидатски статус тој ја префрли во 90-тите години, наведувајќи дека тогаш власта на Бранко Црвенковски немала време за тоа бидејќи се занимавала со матна транзиција и шверц на нафта.

Дискусијата се обиде да ја пренасочи Џевад Адеми од ДУИ, според кого, сите треба да си признаеме дека единствената пречка на земјава за ЕУ и за НАТО е Грција и дека мора да се создадат политички услови, т.е. консензус Македонија да ја донесе најголемата историска одлука за промена на името, за што на Владата ќе и' треба помош од опозицијата. „Но, ваква дискусија не ми дава мотив да верувам во тоа“, изјави Адеми. Тој за случувањата во А1 рече дека се прикажани полошо отколку што се и според него, станува збор за злоупотреба на медиумите, изнесувајќи став дека некои медиуми ја преминале границата на етиката и на самоконтролата.