Македонскиот катастар - лидер во регионот

Задоволна од реформите, Светска банка ќе додели уште девет милиони евра помош за Катастарот

Миркица Поповиќ

Катастарот на недвижен имот и регистрација е добитник на награда од Светска банка за проекти што влијаат на подобрувањето на животот на граѓаните. Овој проект е еден од дванаесетте добитници во трката на 282 проекта од 30 држави од Европа и од Централна Азија. Македонија е единствена држава од Западен Балкан што е добитник на награда од ваков вид. Претставникот на Светска банка во Македонија Маркус Репник нагласи дека наградата за овој проект, финансиран од Светска банка, а поддржан од шведската агенција за развој и од владите на Холандија и на Јапонија, е доказ за доброто партнерство меѓу државата и Светска банка.

Критериумите за избор на проект, според Репник, се иновативност и резултати, а трите главни постигнувања се покриеност на катастарот на недвижен имот, зголемување на бројот на трансакции со недвижен имот и намалување на времето што е потребно за справување со трансакциите. „Околу 98 отсто од државата е покриена со катастар, бројот на трансакциите е двојно зголемен, од 50.000 на 100.000 само во 2009 година, додека, пак, времето за запишување на трансакциите е намалено од 60 на пет дена“, истакна Репник, наведувајќи дека државата во моментов е лидер во регионот во реформите на Катастарот за недвижен имот.

Министерот за финансии Зоран Ставрески најави дека поради успешните резултати Светска банка ќе и' додели на Македонија дополнителни девет милиони евра за реализација на натамошните реформи во Катастарот, подобрување на услугите преку дигитална надградба на националните бази на податоци и помош за управата за имотно-правни односи. Односно за поддршка на процесот за приватизација на урбаното земјиште и подобрување на капацитетот на управата. „На овој начин ќе се овозможи поголема правна сигурност преку целосни и ажурирани дигитални податоци. Тоа ќе биде во функција и на локалниот економски развој, но и на вкупниот економски развој, бидејќи ќе овозможи привлекување инвеститори во државата“, истакна Ставрески.

Директорот на Агенцијата за катастар на недвижен имот Љупчо Георгиевски истакна дека во завршна фаза е електронскиот катастар. Тој очекува до 2011 година електронскиот катастар ќе функционира целосно низ целата држава. „Водење електронска евиденција значи решавање на предмети по редослед, а не преку ред“, рече Георгиевски, нагласувајќи дека на овој начин специфични предмети нема да може да се одолговлекуваат и да се ставаат во фиока. Преку шалтерот за информации електронски за секој предмет ќе се знае за колку дена ќе мора да се реши, а максимумот е 15 дена.