Претходен број

Прослава на 8 Март во центарот на Скопје

Овој ден е прогласен за Меѓународен ден на жената од Обединетите нации со цел да се одбележи улогата на обичната жена во историјата и нејзината борба за еднаквост

Репродуктивната политика на Владата прави притисок врз правата на жената“, изјави вчера претседателскиот кандидат на СДСМ, Љубомир Фрчкоски, кој им се придружи на жените од СДСМ, на маршот што го организираа во центарот на Скопје, по повод Меѓународниот ден на жената - 8 Март. Маршот се одржа под мотото „Жените гледаат напред“. Потпретседателката на СДСМ, Магдалена Несторовска, по завршувањето на маршот, рече дека се решиле на овој начин да го прослават 8 Март со цел да испратат порака до ВМРО-ДПМНЕ и Владата за ретроградната политика во сите сфери на општественото живеење и за правата на жените. Жените во светот го слават Осми март како симбол за нивните права. Овој ден е прогласен за Меѓународен ден на жената од Обединетите нации со цел да се одбележи улогата на обичната жена во историјата и нејзината борба за еднаквост.

На вчерашниот женски марш на социјалдемократките им се придружи и кандидатот за градоначалник на Скопје, Тито Петковски. Според него, обврска на еден градоначалник е да овозможи повеќе пријатни катчиња за да им се олесни животот на жените. По завршување на маршот, тој изјави дека ако биде избран за градоначалник, за кратко време Скопје ќе стане член на „клубот Стразбур“ и ќе отвори претставништво во Брисел.

„Таму се разменуваат искуства и се договара распределба на европските пари. На тој начин Скопје ќе може да користи средства од ЕУ. Формални пречки за тоа нема, само треба добра волја“, рече Петковски. Тој смета дека не постои никаква пречка Скопје да отвори свое претставништво во Брисел, а за тоа не е потребна согласност од Министерството за надворешни работи или од Владата.

„Жената заслужува повеќе права во државата. Досега ги нема реализирано докрај сите права што и' припаѓаат како политичар, жена, мајка, деловен човек и како интелектуалка“, изјави кандидатот за претседател на ЛДП, Нано Ружин, на вчерашната промоција на Декларацијата за унапредување на правата на жените.

Мери Минчоска од Форумот на жени на ЛДП, кој е промотор на Декларацијата, истакна дека како идни претставници во локалната власт ќе се залагаат доследно да ја спроведат, со цел да се зачуваат правата на жената. Минчоска најави дека Декларацијата ќе биде испратена до МАНУ, невладиниот сектор, Хелсиншкиот комитет, ОБСЕ и до сите релевантни институции. (Ж.Х.З.)