Поглед

Хаг, ама во Скопје

Љубиша Станковиќ 

Јохан Тарчуловски и Љубе Бошкоски по се' изгледа дека заборавија и на пријателството што ги врзуваше додека беа на одговорни места во полициската хиеархирија, но и на заедничкото патило, откако беа испорачани во судот во Хаг. Нивната „тивка“ војна, која трае веќе извесен период, од Хаг се пресели во Скопје, поточно во Основниот суд Скопје 1 каде што „брат Јохан“ го тужи „брат Љубе“ за клевета.

Не навлегувајќи во содржината на она што било кажано за Јохан, а со што тој бил наклеветен не само од Љубе туку и од неговата сопруга Виолета, не може а да не им се забележи и на двајцата дека заборавиле на заедништвото низ кое минаа и(ли) минуваат двајцата.

Поднесувањето приватна тужба за клевета од Јохан за Љубе, веројатно, е единствен ваков случај на сите што минале низ Судот за воени злосторства во поранешна Југославија. Лошите манири не завршуваат со испишување графити низ Скопје, со кои се оцрнува едниот или другиот, како и подметнување експлозии во возила.

Ваквите работи не само што не водат на добро туку многу им одмогнуваат и на двајцата, дотолку повеќе што и Тарчуловски и Бошкоски ја исчекуваат одлуката на Трибуналот во Хаг, по поднесените жалби, што нивни што на Обвинителството.

Несомнено дека е грда и сликата кога во скопскиот Кривичен суд ќе се најдат очи в очи и нивните адвокати, кои пред само малку време беа тим што интензивно работеше во корист на двајцата, што и онака доста време минаа во затворот во Шевенинген.

Како што сега стојат работите, имало премалку „братство“ меѓу Тарчуловски и Бошкоски. Но, ако надежта не умре во Хаг, тогаш вреди да се надеваме дека и двајцата ќе се вразумат и оваа лоша епизода ќе ја остават зад себе.