Проширената „Илинденска“ готова до 8 септември

„Илинденска“ ќе биде готова до 8 септември, најави вчера градоначалникот Коце Трајановски. Моментно се асфалтира проширувањето на делницата од раскрсницата со „Рузвелтова“ до „Никола Тесла“, како и на потегот од фонтаната „Лотос“ кон Влада. Поставувањето на асфалтот ќе заврши за седум дена, а до средината на идната недела ќе биде готова и реконструкцијата на раскрсницата со „Свети Климент Охридски“.

Двете нови коловозни ленти ќе бидат со променлива ширина од 3,25 до 3,5 метри, а од двете страни на сообраќајницата ќе има тротоари и велосипедски патеки. Од средното училиште „Орце Николов“ до раскрсницата со „8 Септември“, пак, ќе има и средишно зеленило. „На трасата се решени сите имотноправни проблеми и не очекуваме застој во работата. Со темпото со кое работат екипите на градежното претпријатие ’Гранит’ очекуваме дека проширувањето на целата улицата ќе заврши навреме, а свеченото предавање во употреба ќе биде, како што планиравме, на Денот на независноста - 8 Септември“, нагласи Трајановски.

Во рамките на проектот за проширување на булеварот веќе е завршено поставувањето на атмосферската канализација, а деновиве се привршува и уличното осветление. Градоначалникот најави и расчистување на уште неколку приватни објекти покрај новата сообраќајница, веднаш до Зоолошката градина. Сопствениците на куќата ќе добијат стан, а на нивно место ќе се направи паркинг и пешачка зона.

Проширувањето на „Илинденска“ се финансира од градскиот буџет и чини 120 милиони денари. (С.Н.)