Нови 80 рамковни вработувања

Секретаријатот за спроведување на Рамковниот договор вчера врачи решенија за вработување на 80 административци, кои биле примени со последниот оглас, а десетмина од нив, поради работното искуство, се унапредени на функција државни советници.

Како што информираше вицепремиерот за спроведување на Рамковниот договор, Абдулаќим Адеми, државните советници се унапредени според Законот за државни службеници, бидејќи тие ги исполнуваат сите услови за да работат на тие функции.

„Наша цел е да ја следиме кариерата на државните службеници, кои се примени во државната администрација, а најискусните да ги унапредуваме“, изјави Адеми.

Десетте државни советници ќе бидат распределени во министерствата за транспорт и врски, за одбрана, за правда, за култура и во Кабинетот на претседателот на државата.

„Ќе бидам вработен во Министерството за одбрана, а за работната задача ќе бидам дополнително известен. Имам шест години работно искуство во одбрана, а со новото решение ќе бидам државен советник во Министерството за одбрана“, изјави Мирадим Мустафа, еден од десеттемина унапредени државни советници.

Останатите 70 државни службеници, кои се примени по последниот оглас, ќе бидат распределени во Собранието како преведувачи.

Од јануари до вчера, како обврска од Рамковниот договор, се примени вкупно 370 државни административци.

Втор оглас се очекува да биде распишан деновиве, со кој ќе бидат примени 250 Турци и Роми. Кон крајот на септември се очекува нов, трет конкурс, но не се знае колкава е точната бројка на административци кои ќе бидат примени. (П.Р.)