Цветанов сфати дека бил во заблуда

Откако Ване Цветанов си поднесе оставка, од Владата тврдеа дека го разрешиле поради барањето на Антикорупциска

Александра М. Митевска


Оставката на Ване Цветанов од функцијата директор на Управата за спречување перење пари и финансирање тероризам, иако ја изненади пошироката јавност, веројатно била очекуван потег за потесното раководство на ВМРО-ДПМНЕ.

Но, жестокоста во реториката со која Цветанов удри по Владата и по премиерот Никола Груевски ја шокира владејачката партија, која до неодамна повеќето кадровски промени ги изведуваше без многу бранувања, главно, со тивки оставки и ротирања на други позиции. Брзо потоа од Владата соопштија дека го разрешиле Цветанов, но не поради неговата оставка, туку врз основа на препораката од Антикорупциска комисија.

Кочанчанецот Цветанов, кој од 2006 година беше претставуван како една од ударните тупаници во битката против корупцијата и добро се вклопуваше во шемата на актуелната власт за млади и нови лица на високи и одговорни функции, вчера поднесе оставка.

Тој замина од директорската позиција, обвинувајќи ја власта за лицемерна политика и за незаинтересираност за борба со вистинскиот криминал, порачувајќи му на Груевски дека има подолг стаж од него во ВМРО-ДПМНЕ и извинувајќи им се на неговите блиски што ги довел во заблуда да гласаат за гарнитурата што моментно е на власт.

За опозицијата ваквите обвинувања се доказ дека Груевски и фамилијата свесно прават се' за Македонија да не стане членка на ЕУ и на НАТО, туку да остане сива зона во која ќе владеат криминалот и корупцијата на власта.

Досегашниот директор на Управата за спречување перење пари, кој подолго време јавно се конфронтираше со Комисијата за спречување на корупцијата, која го обвинуваше за нерегуларно работење и за ненаменско трошење пари, во оставката јасно посочува дека не заминува поради барањето на Антикорупциска за негово разрешување - поради 29 вработувања на неопределено време без одобрување од Министерството за финансии.

Владата подолго од еден месец молчеше за барањето на Антикорупциска, за вчера, неколку часа по објавувањето на оставката, да соопшти дека го разрешила Цветанов, врз основа на препораката на Антикорупциска комисија и оти на негово место за вршител на должност е поставен Владимир Атанасов, вработен во Управата. „Владата им порачува на сите граѓани, без разлика на нивната политичка, етничка или каква било друга припадност, дека доследно ќе ги почитува законите и прописите и оти ревносно и бескомпромисно ќе се бори против прекршувањето на законите и против криминалот и корупцијата“, се наведува во владиното соопштение.

„Мене ми е мирна совеста. Апсолутно сум на страна на правдата. Мене ме назначи Владата и јас ја почитувам“, изјави Цветанов за „Утрински весник“ кога Антикорупциска ја потврди иницијативата за негово разрешување.

За можноста Цветанов да биде сменет од директорската позиција, како што дознаваме, се разговарало и на последната седница на Извршниот комитет на ВМРО-ДПМНЕ, кога паднала и одлука за одземање на вишокот функции на партиските кадри низ општините, како вовед во потемелни кадровски поместувања во третиот ешалон на власта. Партиски извори велат дека ваквиот разговор стигнал до Цветанов, така што е прашање дали тој побрзал сам да замине од функцијата за да го оневозможи вмровското раководство да му изнуди оставка. Или неговата оставка и без тоа била прашање на време, со оглед на тоа што подолго време му биле заладени односите со премиерот Груевски, со кого претходно интензивно комуницирале.

Од ВМРО-ДПМНЕ официјално соопштија дека во петокот Груевски го информирал ИК на партијата: „Анализата и наодите на Државната комисија за спречување на корупцијата, во врска со случајот на Ване Цветанов, се издржани и се темелат на законските регулативи“. ИК потоа констатирал дека треба да се побара оставка од Цветанов, кому сопартијците од ВМРО-ДПМНЕ вчера му порачаа „мора да се соочи со фактот дека партиската книшка не му значи ништо ако ги прекршил законите“.

Цветанов, пак, во оставката самиот посочува дека комуникацијата со премиерот му била сведена на нула. Според него, проблемите почнале летото 2009 година, кога почнале да излегуваат на виделина резултатите од работењето на Управата со која досега раководеше, така што со обработката на случаите биле засегнати многу моќни структури, групи и интереси.

Во оставката на Цветанов е наведена целата хронологија на несогласувања меѓу него и Владата - отпуштањето на 20 вработени од Управата или кратењето на 40 проценти од кадрите, контролата на Државниот завод за ревизија, постапката во Антикорупциската комисија што финишираше со предлог до Владата за разрешување...

„Од Владата ми забележаа за промоцијата на прирачникот и за изјавата за медиумите и ми забранија какви било медиумски појавувања - да се заборавел случајот. Кој е виновен се крие, кој е прав се бори, па така за ова се побунив и побарав точката да се стави на Влада и, конечно, да се расчисти проблемот. По ова стигна непристоен предлог да дадам оставка, а во септември да добијам нова функција“, наведува Цветанов. Од ВМРО-ДПМНЕ, пак, демантираа дека вршеле притисоци врз Цветанов и дека му нуделе друга функција.

Социјалдемократите, кои пред околу два месецa бараа разрешување на Цветанов и на директорот на Агенцијата за странски инвестиции, Виктор Мизо, поради наводи од Антикорупциската комисија, вчера, на прес-конференција оценија дека негативните ревизорски извештаи, криминалните јавни набавки, наместените тендери со огромни провизии, богатењето преку ноќ на истакнати функционери, стана заштитен знак на Владата, така што сега за криминалот говорат и луѓе поставени лично од Груевски.