Црковно помирување и обединување
Перо Дамчевски-Коцин, Австралија
Иако сум директно или индиректно вмешан во овие австралиски црковни ујдурми, ќе пробам на најреален начин да ги изнесам моите гледања, без навреди на поединци или поткрепа на една или друга страна. Ова го велам заради доведување или приближување на работите кон едно разумно решавање на црковниот проблем и крај на судските спорови што ги води владиката Петар во име на МПЦ, особено спорот со црквата „Св.Петка“ во Рокдејл, кој спор ја чини нашата заедница тешки милиони долари.
Овде би сакал како појаснение, но и како потсетување на владиката Петар, ако заборавил, кога во 1996 година на редовното изборно годишно собрание во „Св.Петка“- Рокдејл, со кое раководеше лично тој, кога пред собранието пофално се произнесе за Правилникот на „Св.Петка“ и ќе рече цитирам: „Сите црковни општини во Австралија треба да се угледаат на Правилникот на ’Св.Петка‘, навистина е најдобар и за пофалба”. Не знам што сакаше да каже тогаш Петар, го прашувам и него - истиот тој владика, истиот тој Петар, само една година потоа (во 1997 г.) ја втурна токму „Св.Петка“ на суд само поради тој Правилник, кој тогаш толку го пофали, а кој во меѓувреме воопшто не беше изменет.
Дека имало пропусти и од самиот владика, а се разбира и од управите на црквите, тоа го имало, го има и ќе го има тоа, е неодминлива работа. Но, да се доведе целата Епархија во една незавидна ситуација, во еден кошмар, а под водство на еден црковен големодостоинственик, македонски владика, тоа веќе мириса на нешто друго.
Јас стојам на страната на оние кои бараат повлекување на сегашниот администратор, а во замена предлагам да дојде нов, од помладите архијереи во МПЦ и со заеднички сили да застанеме и да си подадеме рака. Да ги урнеме сите бариери и делби, да тргнеме по еден прав пат кој ќе не' одведе на чистина, а со тоа и ќе ги изненадиме непријателите на македонскиот народ, кои, за жал, ги има многу и таму и тука, кои им се радуваат на нашите делби и неслоги.
Ако Синодот на МПЦ застане на здрави нозе и да пресече, со тоа што ќе донесе цврста одлука да се прекинат сите судски спорови, да се покријат сите судски трошоци, да се постави нов архијереј - администратор на овие простори, ќе им ставиме крај на недоразбирањата. Зашто, за жал, морам да нагласам, на повидок се и други нови судски спорови како оној денес на Голд Кост во црквата „Св.Недела” кој штотуку не започнал. Јас лично ги уверувам членовите на Синодот на МПЦ дека овој народ не е толку лош и дека си ја сака својата Мајка Црква и не сака делби и поделби.
Спремен е да си ги плаќа сите црковни давачки по законите на МПЦ како во минатото, а само бара разбирање околу статутот на имотите и не се сложува тапиите на црковните имоти да одат во нечии раце на поединци, оти работите не ни се многу чисти и едноставни. Ова го велам од тие причини и како пример го земам фамозниот „нишки договор”. |
