Што прават денеска

Ани Малинкова

пејачка

Денот ми почнува релаксирано - со кафе, овошје, па фитнес. Потоа одам да ја земам ќерка ми од училиште, па на кафе-дружење со пријателките. Попладне ми е крајно време да одам на шопинг и да се подготвам за утрешниот настап во ревијалниот дел од фестивалот „Филиграни“. Песните се од веќе утврден репертоар, па не морам да се грижам за тоа.

Гордана Челебиќ

мен. за производи во „Нестле Адријатик МК“

Вечерва, од 20.30 часот, е промоцијата на книгата „Гурманско едрење“, што ја подготвивме со Анита Палческа, во издание на „Младинска книга - Скопје“, а во соработка со едриличарскиот клуб „Пампур“. Промоцијата е, всушност, на пампурската забава пред октомвриската регата, па денот го минувам одморајќи се по напорната работа на книгата. Им се радувам на добрата забава, насмеаните лица и позитивната енергија.

Татјана Пуленџовска

новинарка во МТВ

Првиот дел од денот го минувам во МТВ, подготвувајќи прилози за изданието на „Добро утро Македонијо“ в понеделник. Собирам информации за Антонија Шола, која ќе ми биде гостинка во емисијата. По 15 ч. слободна сум за едно кафе-дружење, кое го договарам веќе две недели. Верувам дека денеска ќ�� го реализирам.