Претходен број

Брисел ја фали Грција дека и' помага на Македонија

Комесарката Данута Хубнер изјави дека грчката помош била многу значајна за нашата земја

Од нашиот дописник
Слободанка Јовановска

Брисел - Еврокомесарката за регионална политика, Данута Хубнер, зборуваше деновиве во Атина за помошта што ЕУ им ја дава на земјите од Балканот, и притоа речиси не ги спомна другите земји, бидејќи за сите пораки што ги упати како пример ја посочуваше Македонија. Дали сакаше да и' се додворува на Атина или, пак, говорот и' го напиша член од нејзиниот кабинет со грчко потекло, не сметаа дека е релевантно да објаснат од нејзиниот тим.

Како и да е, Хубнер порача дека се забележуваат значајни разлики во развојот на земјите од Балканскиот регион и дека, со исклучок на Македонија, сите други оствариле раст над 5 отсто. Според неа, диспаритети нема само меѓу државите, туку и внатре во нив, па како најдрастичен пример го посочи главниот град на Македонија, Скопје, каде што, според неа, приходот по жител е дури 70 пати повисок од националниот просек и двојно поголем од приходот во другите региони, со исклучок на Пелагонија.

Како одговорна за менаџирање на фондовите за регионален развој преку ИПА, Хубнер изрази посебно задоволство што може да демонстрира во Атина исклучителен пример за успешно спојување на регионални со инфарструктурни проекти, исто така во Македонија.

„Грчката влада неодамна се согласи да обезбеди 50 милиони евра грант за северниот сосед за да ја кофинансира изградбата на делот од 28 километри што недостига на Коридорот 10, кој го поврзува Салцбург со Солун. Вкупната вредност на проектот е 155 милиони евра и покрај грчките средства, ИПА, земјата- домаќин и Европската инвестициона банка се подготвени да ја затворат финансиската дупка. Без спојувањето на ИПА-фондовите со билатералната помош и со заемите од ЕИБ, Скопје не ќе можеше да го подобри своето меѓународно поврзување и со тоа својот економски и социјален развој. Проектот ја демонстрира користа од координираноста на земјата донор и ИПА“, изјави Хубнер, очигледно фалејќи ја ЕУ, но индиректно ставајќи се на страна на тврдењата на Грција за тоа колку е заслужна и колку може да и' помогне на Македонија.

Притоа, таа потсетува дека на самитот во Солун во 2003 година била потврдена желбата на ЕУ сите земји од регионот да добијат европска перспектива, навестувајќи дека има подготвеност во ЕК да им се даде целосен кандидатски статус на Србија и на Албанија.

Дека грчките инфилтрации во ЕУ работат турбо, деновиве се виде и од текстот објавен во неделникот „Нова Европа“ кој се дистрибуира во Брисел и низ ходниците на Европската комисија, а чиј сопственик е Базил Коронакис, кој од март годинава е во бордот на Регионалниот центар за соработка, инаку наследник на Пактот за стабилност.

Коронакис се најде на функцијата по силни притисоци од Атина и колку тој има намера да придонесува за целите на регионалната соработка може да се види од текстот заглавен како „Ве молиме, доста е Никола: Летни глупости од Скопје“ во кој ја обвинува нашата држава за иредентизам, а писмата на Груевски ги нарекува „ѓубре“. Главен уредник на неделникот формално е синот на Коронакис, но тој нема никаков углед во Брисел токму поради текстовите како овој.