Тутунарите протестираа и на празник

Наместо свечен ручек на Божик, тутунарите и вчера останаа на пунктот кај Тополчани, блокирајќи го патот за Битола

Моника Талеска



ПРИЛЕП - Пелагониските тутунари, наместо свечен ручек и радост во кругот на своите семејства и вчера, на најголемиот христијански празник, Божик, останаа на пунктот кај Тополчани, блокирајќи го патот за Битола. Тие повторно го изразија својот револт од, според нив, игнорантскиот однос на Владата. Му порачаа на премиерот Никола Груевски да дојде на пунктовите каде што протестираат за да може самиот да се увери дека незадоволни се токму тутунарите што гласале за него и за ВМРО-ДПМНЕ.

„Срамота е тоа што не' нарекуваат партиски војници на СДСМ и на Бранко Црвенковски. Кој сака нека дојде и нека се увери дека секој од нас има склучено договор со по еден откупувач и оти сите ние сме чесни производители што живеат само од тутунопроизводство. Никој да не си игра со нашата мака, сите партии нек�� си стојат подалеку од нас. Нас не не' интересира политика, туку откуп по реални цени, а тоа се ланските цени. Само тоа го бараме. Ако неквалитетниот тутун лани беше откупуван за 192 денари за килограм, тогаш како може годинава два пати поквалитетниот тутун од лани да се презема по многу пониска цена. Ако треба родот ќе скапе, ако треба ќе го фрлиме, ама нема да им дозволиме на откупувачите да си играат со нашата мака, да печалат на нашата пот. Ние сите сме тутунарски семејства, живееме само од парите од тутунот, но нема да дозволиме некој да печали на наш грб“, реагираа вчера тутунарите, поканувајќи го премиерот Груевски со нив да го слави Божик на нивната сиромашна трпеза, без месо.

Претседателот на Штрајкувачкиот одбор, Кире Николовски, пак, најави тужби против сите медиуми што завчера, како што рече, ја лиферуваа веста дека неговата сопруга деновиве го предала тутунот по високи откупни цени.

„Точно е дека Елизабета Николовска е моја сопруга и оти дел од тутунот го предадовме на 21 декември, значи пред почетокот на протестите, и тоа по просечна цена од 93 денари. Другиот дел од реколтата го чувам дома и нема да го предадеме додека не ја постигнеме бараната цена. А, сите медиуми што се обидуваат да прават лажни приказни врз нашата мака, ќе ги тужам, па ќе видиме чија вистина е поголема“, револтирано изјави Николовски.

Тутунарите го молат премиерот Груевски да прекине со изјавите дека нема да добијат премија оние што нема да го предадат родот. „Не му личи на премиерот да дава такви изјави. Груевски треба да се залага да најде решение за земјоделците, за тутунарите, за лозарите, за сите земјоделци, зашто ние го гласавме, ние го донесовме во таа фотелја“, велат пелагониските производители и најавуваат дека протестите продолжуваат и денеска.