Промоција на книга за пијанистичките техники од Ана Гацева
Македонската афирмирана пијанистка Ана Гацева, вечерва ќе ја промовира својата прва книга со наслов „Пијанистички техники во концерти на композитори - изведувачи од светската музичка сцена“. Промоцијата ќе се одржи во „Мала станица“, во просторот на книжарницата „Или-или“ со почеток во 20 часот. Рецензенти на трудот на Гацева се проф. д-р Димитрије Бужаровски (од ФМУ, Скопје), проф. Сајмон Јанг (од Тринити Колеџ, Лондон) и проф. Стела Слејанска (од ФМУ, Скопје), а за книгата ќе говори професор Јана Андреевска од Факултетот за музичка уметност во Скопје.
Во книгата, Гацева прави анализа на пијанистичките техники во седум концерти на избрани творци - пијанисти, преку „скенирање“ на нивниот музички јазик, со цел да се согледа, од еден поинаков агол, влијанието на овие великани врз развојот на пијанизмот. Книгата е, инаку, прв научен труд од областа на пијанизмот на македонски јазик кај нас и во неа се поместени резултати од докторската дисертација работена под менторство на проф. д-р Димитрије Бужаровски.
Имајќи предвид дека во Македонија постојат мал број на трудови од оваа музичка област, книгата би претставувала вреден прилог кон музичката литература на македонски јазик, како и за музичките сознанија поврзани со пијанизмот.
Ана Гацева во моментов работи како доцент на Факултетот за уметности во Тетово. Таа е првиот доктор на науки по пијано-интерпретација во Македонија. Со бројните концерти на домашната и европската сцена, во Париз, Њујорк, Салцбург, Софија, Дрезден, Загреб, Белград, Пловдив, Киев, Хвар, Порторож, Гацева се истакнува како еден од најактивните солисти во Македонија. (Т.И.) |
