Експертите предлагаат цензус за првиот изборен круг за претседател
Министерот за правда, Михајло Маневски, на вчерашната јавна расправа, истакна дека предвидените измени на Уставот се однесуваат на намалување на цензусот за избор на претседател на 40 отсто во вториот круг.
„Во конечниот извештај на Набљудувачката мисија на ОДИХР-ОБСЕ по спроведените претседателски избори во 2004 година се препорачува да се отстрани пропишаниот услов со Уставот повеќе од 50 отсто од избирачите да го дадат својот глас во вториот круг за да се избере претседател, со цел да се избегне можноста од неуспешни избори“, рече Маневски.
Во контекст на тоа, тој додаде дека тргнувајќи од реалните состојби и почитувајќи ги препораките во врска со цензусот утврден со ставот 5 од членот 81 од Уставот, Владата подготви предлог за пристапување кон измени на Уставот со насоки за негово изменување.
Со измените, како што посочи Маневски, се предвидува за претседател на Република Македонија да биде избран кандидатот кој во вториот круг освоил мнозинство од гласовите од избирачите што гласале, доколку на гласање излегле повеќе од 40 отсто од избирачите, а не како досега 50 отсто од запишаните гласачи плус еден гласач.
Дарко Алексов од „Мост“ рече дека го поздравуваат овој потег, затоа што со консензус на парламентарните политички партии е дојдено до ова решение. Притоа, тој праша каков тип методологија е аплицирана за да се дојде до 40 проценти одѕив и предложи тој процент да се намали на 30 или воопшто да го нема, како што е во голем број земји во Европа.
Професорката Гордана Силјановска рече дека се работи за невообичаено решение и оти во сите земји што ги познава во вториот изборен круг не се бара изборен цензус. „Ако во вториот круг одат само двајцата најдобри кандидати, тогаш треба да се дојде до избор, а не до повторување на целата процедура. Значи, да се избере еден од двајцата кандидати, додаде Силјановска. (МИА)
|
