Научен собир на млади македонисти
Собирот ќе го поттикне лингвистичкото проучување на македонскиот јазик
Институтот „Блаже Конески“ од Скопје и Катедрата за македонски јазик изминативе два дена го организираа традиционалниот, шести по ред, научен собир на млади македонисти. Целта на Собирот е да го поттикне лингвистичкото проучување на македонскиот јазик од страна на младите истражувачи во Македонија и во светот и да овозможи воспоставување научни контакти меѓу нив. Истовремено, овој научен собир е и место каде што младите лингвисти-студенти, постдипломци и асистенти може да ги изнесат своите ставови, идеи и резултатите од истражувањата поврзани со македонскиот јазик.
Како што не' информираа организаторите, на годинешниот собир ќе учествуваат вкупно 47 учесници, од кои 22 се од земјава, а 25 се од странство. Странските учесници доаѓаат од 12 земји, Австрија, Албанија, Романија, Русија, Србија, Хрватска, Словенија, Полска, Чешка, Словачка, Франција и САД. Ова е најголем број на странски млади македонисти кои некогаш учествувале на некој научен собир и покажува дека интересот за проучување на македонскиот јазик од страна на младите научници во странство е голем.
Учесниците ќе настапат со реферати од областа на семантиката, лексикологијата и зборообразувањето, морфосинтаксата до фонологијата. Темите што се обработуваат се однесуваат и на современата состојба на македонскиот јазик и на неговиот историски развој. Поставените проблеми се разгледуваат и во споредба со други јазици.
Сметаме, велат на Катедрата за македонски јазик, дека во Годината на македонскиот јазик ова е уште еден многу значаен настан за нашата земја, особено поради тоа што се работи за млади интелектуалци кои се во мисија да го шират интересот за македонскиот јазик и македонската култура низ светот, преку својата научна и просветна дејност. (Н.П.)
|
