Власта чисти работни места за синови и ќерки

Работа за своите деца обезбедија битолскиот градоначалник, претседателот на Советот, директорот на „Комуналец“...

БИТОЛА - Последните неколку месеци највисоките функционери во Битола масовно ги вработуваат своите синови и ќерки во јавни претпријатија и во државни институции. Незадоволството расте не само кај граѓаните, туку и меѓу членството на ВМРО-ДПМНЕ.

Работа за своите деца обезбедија градоначалникот на Битола, Владимир Талески, претседателот на Советот, Лилјана Кузмановска, директорот на ЈП „Комуналец“ и локален лидер на ВМРО-ДПМНЕ, Јовко Крстевски, како и други високи функционери во партијата и директори на државни институции.

Битолската јавност силно ја разбранува случајот со вработувањето на ќерката на подрачниот раководител за образование во Општина Битола, Снежана Петровска. По четири години работа со договор, професорка од средното медицинско училиште во Битола, мајка на две малолетни деца остана на улица, за нејзиното место да го заземе штотуку дипломираната ќерка на Петровска.

Четириесетгодишната битолчанка Морена Пандовска, професорка по фармацевтска технологија, дипломирана на Универзитетот во Нови Сад, наместо продолжување на работниот договор добила образложение дека веќе не може да предава во училиштето поради несоодветно образование. Нејзиното занимање не постоело во нормативот на училиштето.

„Ме оставија без работа. Шокирана сум. Се прашувам како по четири години работа во ова училиште ниту една надлежна институција не ме извести дека во нормативот не постои моето звање, дипломиран инженер технолог по фармацевтска технологија и оти не можам да го предавам тој предмет. Ако знаењето е сила и моќ, јас ја имам силата на знаењето, но ја губам моќта во лавиринтите што само ним им се познати“, обвини вчера Пандовска. Таа смета дека е изманипулирана, бидејќи нејзиното работно место однапред било испланирано за друг.

„Ќерката на Петровска дипломира на крајот на август. Излегува дека јас го чував местото за нејзиното девојче“, се пожали Пандовска.

Директорката на битолското средно медицинско училиште „Д-р Јован Калаузи“, Јасмина Никич-Десановска, вели дека не е отпуштени од работа една професорка, туку две, а на нивно место се примени нови со соодветно образование. Според неа, не станува збор за политички вработувања или за политички притисок, туку за почитување на законите.

„Никој не може да биде толку притиснат за да го прекрши законот. Станува збор за коинциденција. Од двете нововработени на определено време едната е ќерка на Петровска, а другата ќерка на судија од Врховен суд. Ние не можеме да дискриминираме некого при вработувањето затоа што е нечиј син или ќерка“, објаснува Никич-Десановска.

Подрачниот раководител за образование во Битола, Снежана Петровска, ги негира обвинувањата што пристигнаа на нејзина адреса. Како добар познавач на состојбите во битолското образование таа вели дека вработувањето на нејзината ќерка е законско. „Не е вработена само ќерка ми. Вработен е и друг фармацевт. Во случајот кога на отпуштената професорка и' истече договорот за работа само ќерка ми беше единствена фармацевтка пријавена во Заводот за вработување“, нагласува Петровска.

Меѓутоа, статистиката на Агенцијата за вработување во Битола вели нешто друго. Во Агенцијата две години за работа се пријавува дипломиран фармацевт и се' уште чека вработување. (А.Б.)