Исклучокот секогаш станува правило
Марија Митевска, Куманово
Ја почитувам Теута Арифи како жена, интелектуалец и политичар. Но, во последно време преку колумните нејзините ставови почнаа да претрпуваат измени. Се прашувам дали пратеничката Арифи ги заборави случувањата во кумановската гимназија, на кои им кумуваше токму нејзината партија? Дали тогаш, кога кумановските гимназијалци од албанско потекло излегуваа на улица, заедно со родителите и професорите, барајќи посебно училиште поради тоа што не се чувствуваат безбедни?! Дали македонските гимназијалци се первертити или мазохисти кои, еве, сакаат самите на себе да си наштетат и да предизвикаат меѓуетнички судир во нашата држава, а притоа МОН дава 29 милиони денари за градење средношколски центар за учениците-Албанци во касарната „Карпош“ во Куманово?
Некако тезите на Теута Арифи губат на силина кога едното го оправдува и подбуцнува, а за другото вели дека не смее да има поделба врз етничка основа. Можеби случајот со Струга е од голема важност што таму градоначалник е Албанец и тоа од нејзината партија, која патем се профилира и декларира како европска ориентирана партија, а во Куманово градоначалникот е Македонец, па еве Арифи не' подучува што е тоа меѓуетнички соживот, но притоа заборавила на случувањата во кумановската гимназија. Свесна сум дека по одредени прашања реагираме повеќе националистички отколку прагматично, што и во една од колумните на Арифи е видливо. Но, кога некои ставови ги пласирате во јавноста, како дел од сопствените видувања, мислења, па и да речеме како политички ставови, ќе мора да го имате предвид и интелектуалниот потенцијал на сите граѓани во државата, без разлика кои се, чии се и какви се.
Во Македонија не живеат дебили, националистички херои, антички мераклии, туку и интелектуалци со космополитски код во својот карактерен ген. Ако во Куманово се гради средношколски центар за учениците-Албанци со кој еднаш е направен исклучок во правилото, не треба да се очекува дека таквиот исклучок да има своја реприза. |
