Претходен број

Затвор само за 13-мина од „Змиско око“

Останатите 59 обвинети добија условни казни во траење по пет години

Љубиша Станковиќ

Само 13-мина од вкупно 72 лица обвинети во случајот „Змиско око“ вчера беа осудени на ефективни затворски казни. За преостанатите обвинети судот одреди затворски казни во траење по две години кои им се заменуваат со условни доколку во наредните пет години не сторат друго кривично дело.

Двете највисоки казни, во траење од по четири години, им се изречени на обвинети кои за цело време откако е започната кривичната постапка беа недостапни за полициско-судските органи. Судот изрече и две затворски казни во траење по три години. Едната од казните се однесува на првообвинетиот Зоран Јанески (45), со прекар Коко, а за осуммина други, главно, раководители и контролори, минаа со две годишни казни, односно на овие 13 обвинети за злоупотреба на службената положба и овластување им е изречена пресуда од само 30 години.

На релативно малиот број казни и нивната висина се надоврза и повлекување на кривичното дело: злосторничко здружување, а судот за неколкумина ја отфрли и самата злоупотреба на службената положба.

Со ваквата одлука на судот во целост падна тврдењето на Одделението за гонење организиран криминал за злосторничко здружување, што во старт ја исклучува можноста обвинетите да беа казнети со најмалку четири години затвор.

Непосредно пред да ја соопшти пресудата, претседателката на Советот, судијката Вангелина Маркудова, ги информираше присутните дека од почетокот на овој најголем судски случај во македонското правосудство, биле одржани 34 главни претреси и дека од познати причини имало уште шест одложувања. Маркудова рече дека на пресудата и' претходело изведување на сите докази што му биле презентирани на судот и од јавниот обвинител и од бранителите на обвинетите. Судот ги задолжи сите обвинети солидарно да ја надоместат штетата од без малку 170 милиони денари, како и намирување на трошоците за водењето на постапката.

Иако на изрекувањето на првостепената пресуда и' претходеше извесна доза нервоза кај речиси сите пресуди, сепак, по нејзиното објавување, кај најголемиот број обвинети можеа да се видат задоволни лица, прегратки и бакнежи.

„Се докажа дека не сме виновни за она за што не' товареа, но условни казни, најверојатно, ни беа изречени само поради тоа што требаше да го покријат притворот што ни беше изречен“, изјави еден од условно осудените, а кој поради најавата за жалба до повисокиот суд, сакаше да остане анонимен.

По барање на некои од адвокатите, судот се повлече за да одлучува и околу прашањето за притворот за последните двајца притворени, но и за укинување на алтернативната мерка домашен притвор. По краткотрајно советување, беше донесена одлука двајцата притворени да останат во притвор се' до правосилност на пресудата, но, затоа, пак, за сите други беше укинат куќниот притвор.

Во изјава за медиумите, јавната обвинителка Вилма Русковска рече дека во дел од пресудата е задоволно, а во дел има незадоволство и најави жалба. Жалба до повисокиот суд најави и адвокатот Саво Коцарев, а неговиот колега Мирослав Вуиќ изјави: „Нема да ја коментирам првостепената пресуда, но ќе кажам дека судот донесе една мошне храбра одлука“. Тој ја спореди одлуката на судот со „сонце кое се појавува срамежливо, но, сепак, се појавува.“

Речиси сите бранители се на ставот дека и покрај релативното задоволство од пресуденото, сепак, ќе вложат жалби до Апелациониот суд. Намерата е да докажат дека не само што не постои злосторничко здружување, туку и во конкретниот случај не постои никаков криминал. Тие се повикаа на неколкуте вештачења и на завршната сметка на ЈП „Македонија пат“.

Судскиот процес за случајот „Змиско око“, кој МВР во септември минатата година го претстави како еден од своите најголеми успеси, започна на 11 февруари годинава и речиси без престан се одвиваше се' до вчера кога беа изречени пресудите.