Македонска трагедија со родилките

Целосен молк зошто се умира на породување, идните мајки во паника

Јасмина Јовановска


Здравствените власти и натаму молчат зошто родилките умираат во родилиштата. Министерството за здравство, иако на јавноста и' вети дека ќе обелодени со какви проблеми се соочуваат родилиштата и која е можната причината за зголемената смртност на родилките, и вчера не откри ништо од експертскиот извештај. Уште помалку се соопштува што ќе преземе Министерството за да се намали македонската трагедијата со родиките, односно кои се итните мерки што ќе ги преземе.

Стручњаците што ги снимија аномалиите во родилиштата иако требаше да и' ги презентираат на јавноста, тоа не се случи. Место брифинг со новинарите во Министерството за здравство, дел од членовите на стручната комисија заедно со претседателот д-р Гордана Адамова, специјалист-гинеколог од Клиниката за гинекологија во Скопје, заминаа во велешкото родилиште. Оправдувањето на стручњаците е дека таму ќе откријат детали од фамозниот извештај на кој работат речиси три месеци. Се' беше така организирано новинарите од Скопје да немаат време да стасаат на местото на настанот.

Неофицијално дознаваме дека Здружението на гинеколозите веќе изработило пишани медицински протоколи за водење на бременоста, кои би требало да стартуваат од септември. Упатствата ќе бидат јавно истакнати во ординациите и со протоколите што ги учеле и на факултет ќе им бидат освежени знаењата на сите матични гинеколози. Со нив ќе има казни како за лекарите, така и за бремените жени. Се размислува, ако бремената жена не се јавува редовно на гинеколог, да го изгуби правото на бесплатно породување. Задолжителни контроли се планираат во 10 недела за откривање аномалии, потоа во 20. недела за формирање на органите и во 30. како се развива плодот.

Колку повеќе Министерството за здравство ја крие причината за умирање на родилките, толку повеќе расте вознемиреноста меѓу идните мајки. Бремените жени се исплашени и се прашуваат каде да одат да се породуваат и колку можат да бидат сигурни и да им веруваат на јавните родилишта. Дотолку повеќе што речиси нема месец, а да не почине некоја родилка или, пак, да немало проблеми при породување, па фатално да заврши или мајката или бебето. По родилката, која откако падна во кома од висок крвен притисок и почина во велешкото родилиште, за време на викендот на Гинеколошката клиника, 20-годишна мајка роди мртви близначиња, кои веќе биле подготвени за излегување на свет. Бременоста на мајката се одвивала нормално и била следена од матичен гинеколог. Но, три дена пред да се породи, бебињата биле се' помалку подвижни, што мајката ја натерало да оди кај матичниот гинеколог, по што веднаш била испратена да се породи.

Од Гинеколошката клиника велат дека не може да се каже што е причината за смртта на бебињата, иако по пораѓањето можело да се види дека папочната врвца биле речиси два пати замотана околу бебињата. Гинеколзоите велат дека тоа не е некој голем проблем, зашто и со такви проблеми бебињата нормално се раѓаат. Зошто починале бебињата ќе се знае по еден месец кога ќе бидат готови и наодите од обдукцијата.

Резултатите од обдукцијата на велешката родилка се познати и требаше да бидат испратени до истражниот судија во Велес. Од Инст��тутот за судска медицина не ги обелоденуваат резултатите, иако лекарски извори се сомневаат дека е можно да има и лекарска грешка. (J.J.)