Игнорирана надворешна политика

Тамара Грнчароска


Надворешната политика вчера речиси и да ја немаше во експозето на премиерот Никола Груевски за сработеното во изминатите четири години. Груевски во тој дел единствено го спомена спорот со името како еден од двата најтешки проблема со кои се соочил во текот на четирите години во премиерската фотелја, а кое го попречилo нашето членство во НАТО и во ЕУ, и покрај исполнувањето на критериумите за членство. Притоа тој го повтори ставот дека Владата ќе направи се' за да најде решение за името и земјата да стане членка на НАТО и на ЕУ, но не по цена да се направи штета поврзана со нашите државни и национални интереси.

На прашањето дали се чувствува одговорен за слабеењето на меѓународните позициите на Македонија и за неактивната македонска дипломатија што доведува до тоа, премиерот изјави дека дипломатијата е максимално активна и дека не може да зборува за слабеење на меѓународната активност и позиции“. Според него, Македонија води тешка битка за зачувување на идентитетот со сериозен противник што е неколкукратно посилен во однос на ресурсите и капацитетите и во однос на неговата позиционираност внатре во НАТО и во ЕУ како член. „Тоа воопшто не е лесна битка“, рече Груевски. „Ние во тој контекст не сме бескомпромисни, сакаме да постигнеме компромис, но кој нема да им направи штета на државните и на националните интереси, всушност, компромис што би бил прифатлив за мнозинството граѓани во Македонија“, потенцираше Груевски.

Но, Груевски, и покрај решителноста решението да го стави на референдум, не знаеше да каже дали медијаторот Метју Нимиц подготвува нов предлог. „Не ни најавил, но може да излезе со такво нешто“, рече Груевски. На прашањето дали доколку има таков предлог би го ставил на увид на јавноста пред да се направи конечната верзија, тој првин одговори дека во моментот кога ќе биде даден предлогот тој ќе биде ставен на увид на опозицијата и на јавноста, но веднаш се коригираше со зборовите: „Ако за тоа има услови“.