„Кермес“ од парк ќе се пресели на суд во Лондон

Трифун Костовски ќе ја тужи државата и ќе бара отштета до 15 милиони евра

Деспина Трајковска


Ни по четири изминати месеци од инсистирањата до надлежните да ги отворат картите на маса за случајот „Кермес“, Трифун Костовски не добил никаков абер. И писмата на двапати испратени на адреса на премиерот Никола Груевски, министерот за транспорт и врски, Миле Јанакиески, и Општина Центар не помогнале ексградоначалникот, кој има инвестиција во „Кермес“, заедно со швајцарската фирма „Гофи“, да добие конкретен одговор дали надлежните имаат намера да го расчистат проблемот или, пак, купуваат време.

Костовски нема да отстапи од намерата да ја тужи државата пред арбитражен суд во Лондон. Очигледно, смета тој, надлежните од познати причини за нив не се нафаќаат да го решат проблемот, додека нему од ден на ден му растат загубите поради запрената изградба.

И додека случајот очигледно е на стенд бај, објектот кој досега веќе требаше да биде изграден како репрезентативен објект во Градски парк, го нагрдува просторот. Напуштено градилиште, „заборавени“ столбови со арматура и оградена парцела е сликата која веќе речиси четири години е дел од паркот.

„Во јануари истекува законскиот рок за одговор на сите мои барања за случајот до нашите надлежни институции и практично тогаш ќе поднесам тужба до арбитражата во Лондон. Немам сомнеж дека ќе излезам победник, бидејќи арбитражата е непоткуплива од кој било аспект, за разлика од дел од институциите во нашава држава. Единствено ми е жал што цехот, всушност, ќе го плаќаат граѓаните. Според пресметките, досега имаме претрпено штета помеѓу 12 и 15 милиони евра и толкава сума ќе барам од државата за обесштетување по основа на загубена добивка, уривање на мојот углед и на угледот на швајцарската фирма ‘Гофи‘“, потенцира Костовски, кој како што одминува времето е убеден дека целиот случај е демонстрација на сила во која се гази правото.

Инаку, изградбата на „Кермес“ беше стопирана во декември 2006 година, кога Министерството за транспорт и врски ги запре градежните активности со барање до Управата за заштита на културно наследство да се изјасни дали некогашниот „Кермес“ бил заштитен споменик. Но, освен наводно донесената одлука, објектот, според досегашните официјални изјави на дел од надлежните, не е заведен во предметниот регистар за споменици на култура. Во меѓувреме, од инвеститорот „Гофи“ беше побарано да извади нова градежна дозвола за да ја продолжи изградбата, но, според Костовски, тоа ќе беше апсурд оти изградбата започнала со целосната документација издадена од Општина Центар во март 2005 година. Дел од неа било и мислењето на Управата, кое не е облигаторно.

Инвеститорот во започнатиот проект „Кермес“ вложи 3,5 милиони евра, од нив 335.000 евра се платени на Општина Центар за комуналии.

Костовски е убеден дека правдата е на негова страна и кога-тогаш „Гофи“ ќе го реализира проектот, па „Кермес“, исто како некогаш, ќе стане собиралиште на скопјани во Градски парк. На местото на старата кафеана, на површина од 3.250 квадрати, треба да никне хотел со четири ѕвездички, висок 10 метри.

За случајот вчера Општина Центар остана без коментар. Оттаму не одговорија ниту на поставените конкретни прашања. Од Министерството за транспорт и врски, пак, рекоа дека на нивна адреса не стасало никакво барање од инвеститорот за средба со министерот на која евентуално би се разговарало за неколкугодишниот проблем.