Се наѕира ликот на општинската зграда на Бутел

Градежните зафати на новата општинската зграда на Бутел се во полн ек и моментално, освен што се става надворешната изолација, се работи и во внатрешноста. Според динамиката со која се работи, општинарите се надеваат дека веќе од 1 март ќе работат во нови простории. Инвеститор на објектот е Општина Бутел, а неговата изградба ќе чини 1,2 милиона евра буџетски средства.

„Додека се поставува надворешната изолација, се избира и еден од неколкуте понудени модели за надворешно украсно стакло на фасадата. Со стакло во темна бордо боја ќе бидат покриени предните греди на објектот, а на останатите делови ќе има стакло со црвеникаво розова боја. Додека се работи на надворешноста, паралелно се изведуваат и занаетчиските работи внатре во објектот, кој се надеваме ќе биде готов според предвидените рокови“, вели Снежана Клинчарова, портпаролка во Општина Бутел.

Објектот ќе има приземје и еден кат и корисна површина од 2.500 квадратни метри. Во него ќе бидат сместени сите служби на локалната самоуправа, а проектирана е и голема сала за седници на Советот. Во посебен дел и со посебен влез ќе биде и Матичната служба, односно салата за венчавки. Изведувач на градежните работи е ДС „Галаб“ од Скопје. (Сн.К.)