Македонија не треба да очекува ништо од Саркози
Франција ќе треба да ја игра европската игра, без ароганција, предупреди Баросо
Од нашиот дописник
Тони Гламчевски
СТРАЗБУР – Проширувањето на ЕУ се губи од агендата на француското претседателствување, односно тоа не беше воопшто спомнато во говорот на премиерот Франсоа Фијон пред Националното собрание. Претседателот Саркози по последниот самит во Брисел нагласи дека нема проширување на ЕУ. „Знаете, јас бев меѓу оние кои ја оспоруваа идејата за проширување без претходна реформа на институциите. Европа тоа го плати прескапо. Да биде јасно, јас сум за проширување. Но, потребно е Европа претходно да ги реформира своите институции пред да се проширува. Правно тоа не можеме да го направиме, сега е потребно тоа и политички да го потврдиме“, рече францускиот претседател.
Според Саркози, сите балкански земји се добредојдени во Европската унија, во моментот кога ќе биде разрешена институционалната криза создадена од ирското „не“. Тој се надева дека тоа ќе биде направено пред идните европски избори. Ова не стои во заклучоците на Советот, но тоа, според него, е присутно во сите глави. Притоа, францускиот претседател нагласи дека отстранувањето на уставната обврска за организирање задолжителен референдум при секое ново проширување на ЕУ го направил за да им помогне на земјите од Балканот.
Останува само случајот со Македонија. Претседателот на Франција, Никола Саркози, е еден од главните поддржувачи на грчката позиција во спорот со името и тој што најотворено врши притисок врз Македонија, давајќи провокативни изјави.
Наместо да каже што планира да направи француското претседавање со Европската унија за да им помогне на Македонија и на Грција да најдат решение, со што ќе и' се дозволи на Македонија да започне преговори, Саркози на саркастичен начин, својствен за него советува: „Сакајте ја Грција и советувајте ја ПЈРМ. Не ви велам вам лично да ја сакате Грција. Добро знаете каква е блискоста меѓу Франција и Грција. А, не ја знаете? Па, тогаш требаше да ве земам со мене во Атина. Но, нашата позицијата е таа. Скопје мора да покаже компромисност“.
Одговор кој е далеку од очекувањата од еден државник што сака и што понекогаш умее, како што го направи тоа деновиве во Израел и Палестина да им зборува на две спротивставени страни. Напротив, тој во нашиот, македонскиот случај, заборави на основните универзални принципи за кои се залага Франција од времето на Револуцијата.
„Франција ќе треба да ја игра европската игра, без ароганција, без хегемонија, па и кога се работи за нејзиниот национален интерес !“, беше предупредувањето упатено на адреса на Елисејската палата, лично од претседателот на Европската комисија, Жозе Мануел Баросо, само еден месец пред Париз да застане на кормилото на ЕУ.
Во предвечерјето на француското претседавање со Европската унија, на сите им е јасно дека пред Париз претстои тежок предизвик. Уште во моментот кога Словенија пред шест месеци застана на челото на ЕУ, Франција гестикиулираше во кулисите, најавувајќи едно грандиозно претседателство, меѓутоа според една омилена француска поговорка ирското „не“ ги „намести стрелките на часовникот“. Уште не започнати, амбициите на Париз беа закочени. Претседателот Никола Саркози се надеваше дека под неговата дирегентска палка ќе се именува првиот претседател на Европската унија, ќе биде склучена Медитеранската унија. Но, нестабилноста на финансиските пазари, рекордната цена на нафтата која, според сите предвидувања, ќе продолжи да расте, влошената економска конјунктура, климатските промени, чии ризици се секој ден повидливи, ќе го наметнат ритамот на француското претседавање со Унијата, призна пред францускиот парламент премиерот Франсоа Фијон.
Една од главните цели ќе биде да се одговори на очекувањата на Европејците. Но, во француските приоритети нема ништо ново и спектакуларно. Климатските промени беа приоритет на германското претседавање, Медитеранската унија уште не родена се соочува со проблеми и двоумења на некои од арапските земји да влезат во неа. На прво место Либија, а потоа и Алжир.
Франција понатаму посакува европска стратегија за енергијата, но и тука сигурно дека ќе дојде до судир на интересите, ако се знае приврзаноста на претседателот Саркози за нуклеарната енергија, чија технологија ја продава насекаде во светот, па дури и во земји чија искреност за користењето на оваа енергија само за цивилна намена е ставена во прашање.
Франција се зафаќа и со предизвикот со производството на храна и реформата на Заедничката европска аграрна политика, во период кога цените на прехранбените производи непрекинато растат. На сите им е позната француската резервираност околу реформите на оваа политика, од која најголема корист влечат француските земјоделци.
Миграционите процеси се следниот предизвик на француското претседавање, Париз ќе направи се' за да биде склучен Европскиот пакт за имиграција и азил. Одбранбената и безбедносната политика се, исто така, приоритетни, при што Франција најавува дека ќе предложи нови прагматични решенија за да се подобрат европските воени капацитети. |
