Претходен број

Централата во Скопје ќе ги помирува раскараните штипски сдсмовци

Во Општинската организација на СДСМ постои голема нетрпеливост и нетолеранција

Иван Бојаџиски

ШТИП - Врвните кадри на штипските социјалдемократи се испокарани, а централата на партијата во Скопје презема обврска да ги помири до крајот на август. На една страна е Здравко Коцев, претседател на Општинската организација на СДСМ со околу триесетина претседатели на месни организации и актуелната пратеничка Маринела Тушева. На другата страна се градоначалникот Панде Сарев, раководството на ЈП „Исар“, бившата пратеничка Верица Филипова, директорот на гимназијата Ристе Петковски, кој неодамна беше исклучен од партијата, како и други поранешни високи раководители на Општинската организација, меѓу нив долгогодишниот кадровик Миланчо Успрцов и поранешниот секретар Трајче Димов.

Повеќе месеци штипска јавна тајна е дека во Општинската организација на СДСМ постои голема нетрпеливост и нетолеранција меѓу двете спротивставени групации. Врвот на нетрпеливоста бил достигнат минатата недела кога претседателот Коцев го поканил градоначалникот Панде Сарев на итен состанок со група од седумнаесет претседатели на месни организации на кој требало да се разговара за вработувањата партиски активисти во јавни претпријатија и установи кои се во надлежност на локалната власт. Сарев го игнорирал повикот по што челникот на СДСМ Здравко Коцев, со сите претседатели на месните организации, тргнале кон кабинетот на градоначалникот, но обезбедувањето им го спре��ило влезот.

Вчера се обидовме да поразговараме со претставници на двете инволвирани страни во спорот, но освен Здравко Коцев, никој друг не сакаше да говори со име и презиме. Коцев изјави дека за актуелното партиско раководство е неприфатливо луѓето, кои благодарение на тоа што се членови на СДСМ добија високи позиции во општината, сега да заборават на партијата и да водат некоја своја, приватна политика, надвор од партиската и општинската. Тоа посебно се однесувало на политиката на вработувањето сдсмовски кадри.

Претставници на другата страна, барајќи да не им се споменуваат имиња, велат дека Коцев откако дошол на челната позиција, наметнал апсолутистичко владеење, дека не почитувал никакво друго мислење, се опкружил само со млади, „пресни“ социјалдемократи со кои можел лесно да манипулира...

Тоа дека работата не е наивна се докажува со решеноста на централното раководство на СДСМ на рапорт да ги викне сите инволвирани страни во „штипскиот случај“ со намера тој да се затвори пред најавениот есенски конгрес на партијата. Во Штип се пронесоа гласишта дека струмичкиот градоначалник и кандидат за нов претседател на СДСМ Зоран Заев добил задача да ги „среди работите“ во штипската Општинска организација.

„Оваа информација не е точна. Точно е само тоа дека највисокото партиско тело има информации за судирот во штипската Општинска организација поради што зазеде став до крајот на идниот месец работите во овој град да се доведат во нормала“, изјави Зоран Заев. Тој додаде дека генералниот секретар Горан Минчев добил задача да организира средби и разговори со сите инволвирани во случајот, по што ќе се донесе заклучок како и на кој начин ќе се смируваат страстите и како состојбата да се доведе в ред.

Заев е убеден сум дека разликите меѓу скараните можат да се решат на разумен начин и со дијалог. „Се надеваме дека ќе ги смириме страстите во штипската Општинска организација на таков начин како што му прилега на СДСМ. Таков проблем имаме само во уште една општинска организација“, потенцира Зоран Заев.