Љубе со нови документи за Мијалков

Обединети за Македонија достави до Антикорупциска комисија нови документи за кои тврди дека се докази за активните фирми во Чешка на директорот на УБК, Сашо Мијалков. Од партијата на Љубе Бошкоски велат дека од документацијата постојат сомневања дека Мијалков има активни фирми што не се пријавени во анкетниот лист. До антикорупционерите се доставени и податоци што треба да се проверат за тоа дали мајката на премиерот Никола Груевски е сопственик на стан во елитен кварт во Прага.

„Од Антикорупциска бараме да се провери сето она што нашиот лидер Љубе Бошкоски го изнесе на прес-конференција, односно нашите сомневања за одредени постојни фирми на господата Саша и Влатко Мијалков, за можноста Надежда Груевска да е сопственик на стан во елитен кварт во странство и друго“, изјави Билјана Јовановска од ОМ. Таа изрази надеж дека Антикорупциска нема да рече дека тие нема да можат да работат по тие документи, бидејќи не се преведени.

Според Јовановска, содржината на документите јасно ја покажувала целата трансакција на финансиски средства на постојните фирми.

„Би и' препорачала на Антикорупциска да вработи професионални преведувачи од чешки јазик, бидејќи ќе следуваат многу документи и ќе имаат многу работа и многу превод“, истакна Јовановска.

Од ВМРО-ДПМНЕ ги демантираа тврдењата од партијата на Бошкоски, кого го нарекоа „кодош што одработува за Црвенковски“. „Ваквите глупости на Љубе се одраз на слабост, нервоза и сериозен страв“, рече Александар Бичиклиски од ВМРО-ДПМНЕ. (П.Р.)