Велосипеди ќе се изнајмуваат напролет

Градот ја затвора првата сезона од изнајмувањето велосипеди. Скопјани повторно ќе можат да изнајмуваат и да возат напролет кога и временските услови ќе бидат поповолни. Трите пункта што беа отворени на јавното паркиралиште „Треска“, плоштадот „Македонија“ и во населбата Аеродром зад ТЦ „Бисер“ зимава ќе бидат затворени, информираат градските власти. Во сезонава што измина велосипеди изнајмиле 7.698 граѓани, и тоа најмногу од пунктот на плоштадот „Македонија“ - 5.031. По него следуваат ТЦ „Бисер“ со 1.742 и од паркиралиштето кај Треска 925 велосипеди. За оваа услуга скопјани плаќаа само 10 денари за еден час.

Проектот за изнајмување велосипеди е на Град Скопје, а се реализираше во соработка со Јавното претпријатие „Градски паркинг“.

За во иднина од Градот најавуваат зголемен број пунктови, а проширувањето, велат, ќе зависи од интересот на граѓаните. (Сн.К.)