Поглед

Маратон за уживање

Роберт Димитриевски

Кратко време по поставувањето на новата атлетска патека во Охрид, според некои, најмодерна на Балканот, кралицата на спортовите и' приреди уште еден убав настан на Македонија. Четвртиот Скопски маратон привлече 2.400 учесници во неколку категории, а падна и рекордот на патеката.

Покрај насмевките на најуспешните натпреварувачи, задоволство можеше да се прочита и на лицата на организаторот на веќе традиционалната спортска манифестација во главниот град. Со право, бидејќи се' помина во најдобар ред, а за тоа се погрижи и армијата волонтери, без кои вакви приредби не можат ни да се замислат.

На Скопје ретко му се случува нешто убаво низ улиците. Неколку илјади луѓе знаат да се соберат и да продефилираат најчесто за да изразат некаков револт за сопствената положба или за вкупната состојба во државата. На прсти можат да се избројат случаите кога многу народ излегол на улица од позитивни побуди. И тоа од најмладо до најстаро. Од министри и дипломати, преку рекреативци и сериозни натпреварувачи до тукушто заодени деца.

Токму затоа, Скопски маратон ја заслужува сета можна поддршка. Таа засега не е доволна за да привлече некое звучно име од светскиот крем во најтешката спортска дисциплина, но растежот од година в година е видлив во секој поглед.

Како што рече еден од учесниците, маратонот во Скопје според квалитетот и нивото на организацијата е некаде на средина во однос на конкурентите од Балканот. Следната цел, бездруго, треба да биде таков сооднос во европски рамки.