Првиот монтажен паркинг се гради во Аеродром

Паркингот е во непосредна близина на полициската станица во Ново Лисиче

На подрачјето на општина Аеродром вчера почна да се гради првиот монтажен паркинг во Скопје и воопшто во државава. На постојниот паркинг во непосредна близина на полициската станица во Ново Лисиче до пролет ќе се изгради челична конструкција со надземна платформа, која ќе обезбеди дополнителни 50 места за паркирање. На неа ќе се изведат и пристапни рампи за влез и излез, скали, сливници за вода и дополнително осветлување. Општинарите очекуваат паркингот да стане функционален најдоцна до лето. За проектот, општината издвои 20 милиони денари од сопствениот буџет. Паркирањето ќе биде бесплатно.

„Убедени сме дека паркингот максимално ќе ги задоволи потребите за паркирање во овој реон од општината. Сметаме дека ваков тип паркиралишта е функционален од неколку причини, не чини многу, при неговата изградба не се уништува зеленило, не се узурпира градежно земјиште, а се добиваат дополнителни паркинг-места. Затоа, в година сигурно ќе изградиме вакви паркинзи и на други локации“, изјави вчера градоначалникот Ивица Коневски.

Овој паркинг, всушност, требаше да се изгради покрај зелените згради спроти „Мекдоналдс“, но по негативните реакции на дел од граѓаните за проектот, градоначалникот одлучи да се реализира во Ново Лисиче. Кај зелените згради, пак, неодамна почна да функционира зонскиот систем на наплата за паркирање. (Дс.Т.)