Претходен број

Каде сте млади социјалдемократи?

Марјанчо Ѓоргиев, Скопје

Само за три години СДСМ ги изгуби вторите избори, а како што тргнало поразот е речиси извесен и на наредните локални и претседателски избори.

Дали некому му доаѓа или му паѓа ова на памет, не ми е јасно. Дали граѓаните, а посебно членовите и симпатизерите на ВМРО - ДПМНЕ сфаќаат дека држава без силна опозиција не е добра и демократска држава, исто така не ми е јасно.

Како млад човек ги набљудувам и ја следам работата на подмладоците на двете најголеми партии во Македонија - на СДСМ и на ВМРО-ДПМНЕ. И морам да признаам дека има многу разлики меѓу нив.

Практично додека едните ги има, другиве како и да не постојат. Додека младите вмровци работат, организираат разни активности, трибини, младите социјалдемократи ги немаше дури ни на терен за време на последниве парламентарни избори.

Овие од ВМРО - ДПМНЕ за неколку години променија двајца претседатели и ништо не се почувствува во интензитетот на работата на овој партиски подмладок. Меѓутоа, младите од СДСМ се' уште тапкаат во место или подобро „тонат“ со истото раководство од пред пет-шест години.

Унијата на млади сили создава и промовира свои млади кадри, а на социјалдемократите им се промовирани (ако и воопшто некој ги познава) „вечните“ раководители кои не би сакал да ги именувам.

И може уште многу да се набројува, да се споредува, меѓутоа состојбата е жална. Како сакаме да имаме силна демократија кога опозицијата нема подмладок. Како можеме да очекуваме младите да добиваат поголеми права, кога само едниот политички подмладок се бори за нив, а другиот е опседнат сам со себе и со суетите на „вечните“ властодршци кои имаат поминат мандат?

Замислете да победеше СДСМ, со ваква младина кои кадри ќе ги понудеше? Истите како во периодот од 2002 до 2006 година кои беа и поразени? Или стандардно немаше да понуди многу млади кадри?

Почитувани поранешни, сегашни и идни лидери и раководства на СДСМ, ве молам разберете дека не е толку важно кој од вас ќе победи во внатрепартиската битка, колку што е важно Република Македонија да добие вистинска опозиција на власта. А, тоа несомнено значи да се „отстранат“ од политичката игра „вечните“ властодршци за да може повторно во СДСМ да се вратат сите оние разочарани млади членови и симпатизери кои секогаш со гордост истакнувале дека се членови на СДСМ, но и на социјалдемократскиот подмладок. А, јас лично познавам многу такви кои ниту ќе се вратат, а ниту пак би гласале за СДСМ, бидејќи знаат каква перспектива тие и Македонија имале и би имале со таквиот подмладок.