Христијан Шапкар бил под дејство на алкохол кога се случила страшната несреќа кај каналот Студенчишта во Охрид. Двонеделните анализи на крвта и на урината на притворениот Шапкар неофицијално покажале дека тој во крвта имал 0,72 промили алкохол и 1,28 промили во урината. Во таква состојба тој го возел глисерот, кој удрил во пловниот објект на Ирина Романова-Муцунска, која го загуби животот во несреќа. При анализите не се пронајдени траги од алкохол во крвта на починатата Муцунска. Според одредбите од Законот за внатрешна пловидба, не е дозволено управување глисери или скутери под дејство на алкохол.

Ваквите резултати добиени од анализата во МВР се очекува да бидат испратени до истражната судијка во Охрид, која го води случајот. Деновиве се очекува да пристигнат и резултатите од обдукцијата на телото на Муцунска, а во тек е постапката за одредување вешти лица, кои ќе го вршат вештачењето на двата глисера, со цел да се утврдат сите околности околу несреќата. Шапкар, кому му е одреден притвор од 30 дена поради предизвикување на тешката водена несреќа, се' уште се наоѓа во болница, поради проблеми со ’рбетот.

Трагедијата во која загина Муцинска се случи во саботата вечерта околу 20 часот пред влезот во каналот Студенчишта во Охрид. (Х.Р.)