ТЕТОВО - Пасионираниот ловџија Небојша Видоевски (50) од Тетово останал без пет ловечки кучиња, што биле отруени во дворот. Кучињата биле пронајдени мртви во понеделникот наутро, по што случајот веднаш бил пријавен в полиција. Кучињата биле отруени со подметнато затруено месо. Семејството се сомнева дека злосторството над кучињата го направиле некои соседите. На местото на настанот биле видливи и стапки од човек, најверојатно од тој што го подметнал затруеното месо.

Семејството Видоевски живее на улица „Љубо Божиновски-Пиш“ број 75, во близина на некогашната куќа „Тетовчанка“.

„Околу 2,30 часот, кога пристигнав дома, кучињата се раздвижија, залаја, што значи дека беа здрави и живи. Утрото татко ми ги нашол мртви. Досега имаме одгледано над 20 ловечки кучиња и никогаш не сме имале проблеми. Татко ми е ловџија повеќе од 30 години. Ова е првпат некој вака да се пресметува со нас. Одгледувањето ловечки кучиња за нас е семејна традиција“, вели Жарко Видоевски (22), син на Небојша. Тој додава дека најголема штета е направена на двомесечното куче од француската раса „посавец“, а неговата вредност изнесувала над 6.000 евра, колку што и го платиле. Другите четири кучиња се од расите „алпинка“, „барак“ или мелези „посавец“, на возраст од две до пет години. Сопругата на Небојша, Роса, тврди дека никогаш и со никого не се скарале. (Г.Е.)