Претходен број

Славески ќе проговори дали ќе остане во ВМРО-ДПМНЕ во септември

Партиски извори прогнозираат дека ексминистерот е далеку од гувернерската позиција што требало да му биде понудена

Жаклина Хаџи-Зафирова

„Министер може да биде секој, дури и човек со двегодишно работно искуство, а професорската кариера се гради со децении“, коментира ексминистерот за финансии, Трајко Славески, по неговата смена, не сакајќи да наведе на кој министер во Владата се однесуваат овие квалификации. Славески, човекот кој ќе остане запаметен во македонската јавност по неговата историска реченица дека „не бил ехо, туку глас“ во Владата на Груевски, деновиве ги минува во професорскиот кабинет на Економскиот факултет. Не сака да коментира за политиката и за своето натамошно дејствување во партијата на Груевски, каде што се' уште важи за член на нејзиниот Извршен комитет, а до пред две години беше и потпретседател на ВМРО-ДПМНЕ. Вели, за партискиот ангажман ќе каже повеќе во септември откако ќе се врати од годишниот одмор за кој се подготвува.

Тој демантира дека ВМРО-ДПМНЕ му го свртело грбот, а не сака да зборува и зошто пратениците од оваа партија го избегнуваа на собраниската седница кога се очекуваше образложението за неговата смена. „Не, не, тоа не е точно дека ме избегнуваа“, убедува ексминистерот, кој од петни жили ја бранеше министерската фотелја, а сега вели дека повеќе му значи да биде професор. На Економскиот факултет се врати само еден ден по собраниската седница на која беше изгласана негова смена, па од септември ќе се врати на своите предавања по предметите Макроекономија и Државна регулација, предмет за кој вели дека самиот го дизајнирал. Предава и на постдипломските студии.

Но, извори од ВМРО-ДПМНЕ тврдат дека Славески, сепак, не бил омилен во партиските редови, а некои прогнозираат дека веќе е далеку од гувернерската позиција што, наводно, требало да му биде понудена. Ова, како што се тврди, најмногу поради неговите „испади“ во Собранието, при што се мисли на тврдите ставови во бранењето на своите позиции и пораката за ребалансот на буџетот.

Го опишуваат како принципиелен, човек кој немал свој круг пријатели во партијата, па по смената се' повеќе го одбегнуваат, најмногу поради неговото однесување во Собранието за што и му се лути. „Министерувањето го сфаќаше како катедра. Беше крут и немаше свој круг блиски пријатели во партијата како другите. Но, не се дистанцира само партијата од него, туку и тој од партијата“, коментираат од ВМРО-ДПМНЕ.

Во ВМРО-ДПМНЕ велат дека Славески, кој важеше за трет човек во партијата, како што стои на партискиот интернет сајт, се уште не го изгубил местото. Илија Димовски од ВМРО-ДПМНЕ тврди дека со случувањата околу Славески докажале дека како партија имаат доблест да покажат дека можат да функционираат нормално, за разлика од други партии.

„Славески се' уште е член на Извршниот комитет. Нормално, ако има седници на Комитетот ќе биде повикан како и сите други членови“, вели Димовски.

Но, дали демократскиот амбиент во партијата на Груевски ќе се докаже навистина во случајот со Славески? И колку вреди неговото повеќедецениско пријателство со партискиот шеф на ВМРО-ДПМНЕ, со кого си заблагодарија за досегашната соработка, но јавноста, сепак, не дозна која е вистинската причина за неговата смена. Свежи се сцените во Собранието кога партиските колеги на ексминистерот одбегнуваа да се поздрават со него, а тој изгледаше навистина осамен во последните часови од своето министерување.