Крвав шверц со оружје кај Радуша

Откако им било алармирано да запрат, шверцерите почнале да пукаат во полицијата

Горан Адамовски

Радуша - Четири лица загинаа во оружен инцидент што вчераутро се случи на патот меѓу скопските села Свиларе, Радуша и Рашче. Во заседа на МВР се убиени ��етворица шверцери на оружје, кои откако им било наредено да запрат со комбето во кое се превезувале, започнале да пукаат во полицијата. Станува збор за двајца македонски и еден косовски државјанин, а кај едно лице се' уште се утврдува идентитетот.

Според министерката за внатрешни работи, Гордана Јанкулоска, овој шверцерски круг засега не се поврзува со големиот арсенал оружје што пред две недели беше запленет на Скопска Црна Гора. Јанкулоска тврди дека нема потреба за загриженост околу безбедносната ситуација во земјава.

Акцијата на полициските специјалци беше реализирана во три часот наутро. По добиените сознанија, полициските сили вршеле контрола на локалниот пат меѓу овие три скопски села. Откако на патот наишло бело комбе „мерцедес спринтер“, припадниците на МВР му сигнализирале да запре.

„Возачот го запрел возилото, ја подотворил вратата, но во тој момент другите три лица што биле во задниот дел, почнале да пукаат кон припадниците на полицијата“, изјави Јанкулоска.

Специјалците возвратиле, по што биле убиени сите четворица шверцери. Нивниот идентитет бил утврден врз основа на личните документи што биле пронајдени кај нив.

Двајца од нив се жители на скопските села Грчец и Мерово, еден е косовски државјанин, а кај четвртото лице не биле пронајдени никакви документи. Неофицијално, личните документи гласеле на имињата Кемал Фејзула од Грчец и Шабан Зенуни од Мерово, односно Џабер Шаља од Косово. Зенуни е шестообвинет во случајот „Мавровски работници“ и по него е распишана потерница уште од декември 2001 година. Телата на убиените се предадени на обдукција, а полицијата утврдува дали документите што биле пронајдени кај нив се вистински.

„Станува збор за лица што и' се добро познати на полицијата, особено едниот од нив, кој бил пријавен за напад врз овластено службено лице, а во отсуство е осуден на девет години затвор и по него била распишана меѓународна потерница“, велат од полицијата.

На локалниот пат што од Кондово и од Долно Свиларе води кон Рашче и кон Радуша, вчера беше мирно. Полицијата по само неколку часа од инцидентот, го расчисти теренот. Сепак, траги од крв и натаму беа забележливи на измиениот асфалт. Десетиците чаури, скршени делови од возилото, но и кованици од 10, 20 и 50 евроценти, ја дополнуваа сликата за инцидентот. Според полициски извори, комбето со фалсификувани прилепски таблички било натоварено во Косово, а потоа по илегален пат преку Радуша требало да замине во внатрешноста на земјава.

„Каде требало да заврши, рано е да се каже. Се' уште работиме на случајот“, велат од полицијата.

Мирно беше и во селата Радуша и Долно Свиларе. Жителите на Радуша велат дека од страната на Свиларе слушнале пукотници, а дека полиција кај нив во село „не влегува веќе со години“. Во Свиларе, село што е најблиску до местото каде што се случи инцидентот, велат дека пукотниците траеле неколку минути.

„Се слушаа бомби. Не знаевме што е работата, па се скривме во подрум“, вели еден повозрасен жител на селото. Тој вели дека утрото околу 7 часот кога училишниот автобус ги носел децата во Кондово, полициските специјалци го блокирале патот, бидејќи тогаш се повлекувале од местото на инцидентот.

Изрешетаното комбе, во кое имаше траги од куршуми буквално на секој дел, како и запленетото оружје вчера беа поставени во касарната во Ѓорче Петров.

Надлежните информираа дека биле запленети три рачни фрлачи, три вреќи гранати, шест автоматски и една полуавтоматска пушка, вреќа експлозив ТНТ, шест рачни бомби, еден рачен фрлач на гранати од 40 милиметри со 15 гранати, половина вреќа противпешадиски мини, две гранати за бесповлечен топ, кутија со 12 гранати за минофрлач од 60 милиметри, муниција за автоматските пушки, војнички чизми, амблеми на УЧК и мапа. Оружјето е од југословенско производство, а дел од него бил конзервиран и подолго време закопан во земја.

Со кого била поврзана оваа група и која била нивната цел - допрва ќе се утврдува. МВР засега не го поврзува овој случај со инцидентот од пред две недели кога македонската полиција беше нападната во близина на Блаце на границата со Косово. Тогаш беа откриени три бункери со оружје.

Според министерката Јанкулоска, овие две акции се „доказ дека нема причина за загриженост кај граѓаните, бидејќи полицијата има целосна контрола и располага со сите информации што се релевантни за безбедноста на Македонија и сигурноста на граѓаните“.

„Уште еднаш испративме јасна порака дека никакво насилство не може да се толерира и дека најостро ќе возвратиме на сите обиди за нарушување на безбедноста и загрозување на безбедноста на граѓаните и посебно на загрозување на сигурноста на полициските службеници, кои ги извршуваат своите редовни задачи“, оцени Јанкулоска.

Според неа, добро било што по првата акција на Блаце, „политичките парти��, односно сите релевантни чинители и од Македонија, претставниците на меѓународните организации, но и од соседството се оградија од овие поединци и групи што имаат екстремни намери“. (Г.А.)