Претходен број

Поглед

Еден оди, тројца води

Димитар Чулев

Македонија го засили својот преговарачки тим за уште еден, овој пат, „легален“ преговарач откако шефот на државата и премиерот не можеа да се договорат дали Никола Димитров, именуван и разрешен од Бранко Црвеновски, бил „вистинскиот“ човек кој затаил , а шефот на Кабинетот на премиерот, Мартин Протоѓер, бил суфлер или супервизор на Димитров во многу сериозниот преговарачки процес со Грција за името.

Најдено е соломонско решение, со избор на „третиот човек“ кој исто онолку колку ја збунува македонската јавност, барем двојно ќе ја „шокира“ Грција оставена неподготвена на само едниот адут - Василакис.

Тешко е да се предвиди дали новото кадровско решение извлечено како ковертирано во ликот на македонскиот амбасадор Зоран Јолевски во Вашингтон е вистински лек за одмрзнување на хибернираните грчко-македонски преговори околу името. Вината за умртвените напори за постигање решение со Грција, подеднакво е распоредена на товар на главните играчи во надворешната политика – Кабинетот на претседателот и Кабинетот на премиерот сосе министерствата – и, неизбежен е впечатокот дека поради персоналниот анимозитет на Црвенковски и Груевски, сега сме сведоци на формациско екипирање на преговарачкиот тим во Њујорк според теркот на една наградна игра од времето на пред-транзицискиот период на весникот „Нова Македонија“ наречена „Еден оди, тројца води“.

Имено, третиот во тимот, ако не сака Димитров да остане во него, допрва треба да се одреди. Ред е во преговарачкиот тим да биде вклучен претставник на малцинството кој, според Бадинтер, има право на тоа, а според незадоволството на Албанците од блокираните НАТО и ЕУ интеграции – дури е нужно да се појави во Њујорк.