Поглед

Должат, а блокираат

Александриjа Стевковска

Државата вежба фискална дисциплина, блокирајќи фирми и фалејќи се дека го прави тоа за доброто на вработените, а никаде не спомнува дека на дел од тие фирми токму таа им е најголем должник. Во услови кога кризата ги десеткуваше фирмите и нивното работење, не е на место потенцирањето дека со блокирање на фирмите се покажува нивниот еднаков третман пред власта и законот, а токму поради побарувањата што тие фирми ги имаат од Владата, не се во можност навреме да ги исплаќаат бруто-платите. Рака на срце, никој не го оправдува замижувањето пред некои пропусти на фирмите, како и неисплаќањето плати на вработените, но за да се суди мора да се согледа целата слика, која упатува дека Владата е неправедна, барем кон фирмите на кои таа треба да им го полни буџетот.

Со блокирање на компаниите на кои Владата им е должник, таа само ги втурнува во финансиска бездна од која тие се' потешко ќе се извлекуваат. Имено, за да се одблокираат, фирмите се снаоѓаат како што знаат и умеат, па немајќи континуиран прилив на приходи, а за да обезбедат исплата на плати на вработените, префрлаат од шупливо во празно, зајмувајќи и прераспределувајќи пари од други ставки, со што загазуваат во подлабока загуба. Снаоѓањето за исплата на плати, под закана за казни, може да биде ефикасно еден-два месеца, но што понатаму, кога сите трикови за снаоѓање ќе се потрошат и кога сите сметки ќе се исцедат? Кој тогаш ќе ги спасува овие фирми и нивните вработени?

Очигледно, Владата има механизми како да ги принуди фирмите да си ги плаќаат давачките спрема државата, но такви механизми не поседуваат фирмите за да ја принудат Владата да ги плати своите долгови кон нив! Ако сите мора да ги плаќаат своите сметки, зошто не го прави тоа и власта?