Донација за инвалиди преку хумана акција
„И малку е многу“ е мотото на хуманитарно-продажбената акција што за утре ја подготвува Здружението на жени „Голема мајка“ од Општина Сопиште. Акцијата ќе се одржи во општинската зграда со почеток во 17 часот. Идејата е со продажба на домашни пити, колачиња, плетени и шиени ракотворби, украси и други рачно изработени дела да се обезбеди донација за десет инвалидизирани лица, жители на оваа општина. Ана Велковска, претседател на Здружението, ги повикува сите хумани луѓе да се вклучат во акцијата и да донираат кој колку може. За таа цел во НЛБ Тутунска банка отворена е и трансакциска сметка на Здружението на жени „Голема мајка“ 210063825920146. (Сн.К.) |
