Насловна

А1 на продажба за 25 милиони евра?

Близок роднина на Рамковски, наводно, барал купувачи низ Турција. Од А1 официјално велат дека не слушнале за тоа

Горан Адамовски

Телевизијата А1 бара нов газда. Цената што се бара е 25 милиони евра, од кои ќе бил намирен долгот од 9,5 милиони евра кон Управата за јавни приходи. Вакви шпекулации се слушаат деновиве откако телевизијата објави дека поради неможност за нормално функционирање, морале да ги пратат новинарите на принуден одмор, а ќе се емитуваат само десетминутни технички вести.

Како што се зборува меѓу вработените во А1, близок роднина на сопственикот Велија Рамковски престојувал во Турција каде што барал купувачи. Наводно, првичната сума што била побарана од заинтересираните била 25 милиони евра, со кои потенцијалниот сопственик добивал одврзани раце да прави што сака. Според овие гласишта, заинтересирани имало порано, односно пред неколку месеци, но не и сега откако УЈП извести колкаво е побарувањето.

„Како што се зборува, сега немало заинтересирани, бидејќи никој не сакал да си пр��дизвика проблеми со евентуалното купување на телевизијата што е во ужасни односи со власта“, велат вработени во телевизијата. Главниот и одговорен уредник на А1, Младен Чадиковски, тврди дека првпат слушал оти се продава телевизијата. „Прв глас сте ми вие, навистина друго не би можел да кажам“, вели Чадиковски.

Наводно, во евентуалниот бизнис со продажбата на телевизијата не биле опфатени трите весници на „Перо Наков“ што престанаа да излегуваат. Адвокатот на Рамковски, Мирослав Вуиќ, ни изјави дека не знае ништо за евентуалната продажба, правдајќи се со зафатеност на вчерашното рочиште за случајот „Пајажина“, кое траеше до попладневните часови.

Според вчерашните информации од А1, најголем дел од новинарите се заминати на принуден одмор, а помал дел од нив доаѓаат во телевизијата за да ги подготват техничките вести што се читаат во десетминутниот дневник. Исклучок биле емисиите од забавен карактер, кои продолжуваат да работат како предходно.

Ваквата ситуација се очекува да трае до 8 август кога е последниот ден за плаќање на долговите на телевизијата кон УЈП. „Овие мерки се преземаат во функција на штедење и намалување на трошоците во телевизијата. Веќе сме сосема исцедени, но и натаму ќе ја исполнуваме нашата обврска за информирање, со емитување 10-минутни вести во досегашните термини“, изјавија завчера од А1.

Ваквата одлука следуваше само еден ден откако згаснаа трите весници „Време“, „Шпиц“ и „Коха е ре“, кои ги издава компанијата „Плус продукција“, а стотина новинари од сите три медиуми заминаа на принуден одмор. Ситуацијата во весниците се проблематизираше откако УЈП побара да бидат еден милион евра за данок што го должеле кон државата. (Г.А.)