Насловна

Новинарите излегоа на Марш за солидарност

Седмата сила побара враќање на достоинството на професијата

„Не сакаме милост од никого“, порача Насер Селмани, претседател на Здружението на новинарите (ЗНМ) од вчерашниот протестен Марш на солидарноста, со кој новинарите од земјава побараа враќање на достоинството на професијата. Повеќе од 200 новинари вчера се појавија на маршот што го организираа ЗНМ и Самостојниот синдикат на новинари, а кој симболично почна во пет до 12 часот.

Насобраните новинари што се собраа пред седиштето на Здружението на новинари, преку улиците „Даме Груев“ и „Димитрие Чуповски“, продолжија до плоштадот „Македонија“, каде што по кратко време се разотидоа.

„Излеговме поради колегите што останаа без работа, секојдневното кршење на нашето професионално и човечко достоинство. Ова што ни се случува не заслужува да биде проследено со молк и рамнодушност ниту од јавноста ниту од фелата“, изјави на собирот претседателката на новинарскиот синдикат Тамара Чаушидис, која рече дека новинарите можат да бидат силни само ако се обединети.

Чаушидис рече дека дошле на маршот и за оние што не се појавија на протестот, како и за оние што ги презираат и им се потсмеваат. Во името на Синдикатот, таа побара од работодавците да го признаат Синдикатот, и тоа не само како декор, туку како партнер во социјалниот дијалог. А од институциите побара да не бидат орудие за дисциплинирање на новинарите, туку партнер во борбата за неселективно почитување на законите.

„Ајде да го почитуваме законот, да не го третираат новинарскиот труд само како алатка за исполнување на личните бизнис или политички интереси“, им порача Чаушидис на работодавците, додавајќи дека борбата продолжува во редакциите и во судовите. Таа најави и идни собири.

Претседателот на Здружението на новинарите, Селмани, изјави дека со собирот, новинарите докажале дека постои солидарност во фелата. Тој се огради од политизација на протестот.

„Ова е марш на солидарноста на сите наши колеги на кои им се кршат нивните работнички права. Сакам да ги потсетиме државните институции дека доколку во изминатиот период се почитуваше законот и функционираше правната држава, ова што сега се случува во Македонија немаше да се случи“, рече тој, барајќи да се почитуваат работничките права загарантирани со закон.

Селмани потенцира дека не сакаат државните органи да ги заштитат новинарите од откази, туку да спречат вработување на црно во медиумите. Тој порача дека следниот пат новинарите ќе протестираат на местата од каде што се предизвикуваат проблемите на новинарите.

Македонскиот институт за медиуми со соопштение го поддржа протестниот марш. (Ж.Ѓ.)