Порака од ЕУ: Македонија назадува

Владата треба да биде загрижена од најавите дека ЕУ може да се откаже од нас

Тамара Грнчароска


Доколку Македонија продолжи да се однесува на ваков начин спрема реформите, т.е. да не прави ништо, самата ќе се пасивизира во однос на европските интеграции, е пораката неофицијално на претставниците на Директорат за проширување на Европската комисија, кои вчера и денеска се наоѓаат во работна посета на Македонија. Тие на средбите со директен и алармантен речник укажале дека доколку до самитот на НАТО во ноември не се реши спорот со името, Унијата ќе крене раце од нас.

Делегација на ЕК престојува во земјава со цел да изврши процена на спроведувањето на Договорот за стабилизација и асоцијација, а ја предводи раководителот на одделот надлежен за Македонија, Кристијан Хедберг. Тој овие два дена има работна средба во Секретаријатот за европски прашања на владата, како и средби со лидерот на СДСМ, Бранко Црвенковски, со потпретседателот на ДУИ, Рафиз Алити, како и со Таир Хани и Џевад Адеми. За попладнето беше најавена средба и со премиерот Никола Груевски.

Во разговорот со Црвенковски посебно биле акцентирани состојбите во државната и во јавната администрација, судството, политичкиот дијалог и други области. Притоа, Хедберг му укажал на Црвенковски дека не само што не е постигнат очекуваниот напредок на земјата туку се преземаат чекори, кои можат да се толкуваат како враќање назад. Црвенковски од своја страна посочил дека процесот на реформи во земјата е забавен и во голем број области не е констатирано исполнување на европските и демократските стандарди, како што се примерите со партизација на јавната администрација, зајакнување на говорот на омраза и отсуство на политички дијалог како свесна определба на власта.

На средбата со претставниците од ДУИ се разговарало за политичкиот дијалог власт - опозиција, како и за меѓуетничкиот дијалог. Исто така, претставниците од ЕК се интересирале и за имплементацијата на Охридскиот договор, а било отворено и прашањето за хашките случаи. Претставниците од Директоратот за проширување се интересирале и за пописот во земјава, кој ќе одржи идната година.

Неофицијалните информации до кои дојде „Утрински весник“ се дека Хедберг на средбите информирал дека во заклучоците по состанокот на Комитетот за стабилизација и асоцијација овие два дена ќе има негативни забелешки за политичкиот дијалог и за координацијата во парламентот. Ќе се забележи, исто така, дека собранискиот деловник се' уште не е донесен и дека нема дијалог меѓу коалициските партнери. На тапет на делегацијата од Директоратот за проширување се и реформите во јавната администрација, реформите во судството, борба против корупцијата. Тие конкретно се интересирале и за судскиот спор со ЕВН, кој, според нив, мора што поскоро да заврши.

За претстојниот самит на ЕУ за две недели најавите, пак, се дека Унијата или ќе не' игнорира и нема нашето прашање да го стави на дневен ред или, пак, ќе го повтори заклучокот од декемврискиот самит.